L’Associacion Brasilièra dels Juristas per la Democracia (ABJD) a depausat una denóncia a la Cort Penala Internacionala contra lo president del país, Jair Bolsonaro, per de crimes contra l’umanitat. L’ABJD assegura que lo cap d’estat de Brasil ten d’actituds “completament e absoludament irresponsablas”. Lo tèxt de la denóncia, redigit pel jurista estatsunidenc Charles Kurmay e per l’espanhòl Ricardo Franco Pinto, ditz que “per accion o omission, Bolsonaro met la vida de la populacion en perilh, en cometent de crimes e en meritant l’accion de la Cort Penala Internacionala per la proteccion de la vida de milièrs de personas”.
 
 
“Los estats que se son mostrats negligents amb la politica de quarantena son los ont l’impacte de la pandemia s’es revelat màger, coma Itàlia, Espanha e los Estats Units”
 
Segon l’ABJD, Bolsonaro comet lo crime d’epidemia, previst dins l’article 267 del Còde Penal brasilièr. “Los crimes comeses afèctan grèvament la santat fisica e psicologica de la populacion brasilièra, en l’expausant a un virus letal per divèrses segments e amb una esfraiosa capacitat de proliferacion coma ja s’es demostrat dins divèrses païses. Los estats que se son mostrats negligents amb la politica de quarentena son los ont l’impacte de la pandemia s’es revelat màger, coma Itàlia, Espanha e los Estats Units”, çò soslinha la denóncia.
 
 
“Del costat dels entrepreneires sens escrupuls”
 
A mai, los juristas pròdemocracia apondon que Bolsonaro mesprèsa las autoritats scientificas màgers. “Lo President de Brasil fa lo resson dels entrepreneires sens escrupuls e vòl pas adoptar lo modèl mondial de confinament social, quita d’agir en l’estrategia per aplatir la corba d’infeccion e ajuda a l’expansion e a l’aument de la contagion, çò que fatalament saturarà lo sistèma de santat en Brasil ”, çò precisan.
 
Lo Ministèri Public Federal de Brasil assagèt de demandar que lo procuraire general del país denoncièsse Bolsonaro per aquel crime. Mas l’afar es estat classat. Ara l’ABJD demanda que la Cort Penala Internacionala se pronóncie d’una manièra urgenta. “Podèm pas acceptar çò qu’es a arribar en Brasil, es a dire la totala impunitat de Jair Bolsonaro, qu’es lo principal factor que fa créisser progressivament la practica de nòus crimes”.
 
Es pas la primièra denóncia que la Cort de l’Aia recep contra Bolsonaro. En novembre passat, lo Collectiu de Defensa dels Dreches Umans lo denoncièt per “incitar al genocidi e promòure d’atacas sistematicas contra los pòbles indigènas”.
 
 
 

A ABJD denunciou o presidente Jair Bolsonaro ao Tribunal Penal Internacional (TPI) pela prática de “crime contra a humanidade” por tomar “atitudes irresponsáveis que, por ação ou omissão, colocam a vida da população em risco” em meio à pandemia coronavírushttps://t.co/ABTkohBffO

— ABJD (@abjdbr) April 3, 2020