Pel president de Portugal, Marcelo Rebelo de Sousa, es ora que las bancas tornen lo sosten que recebèron pendent la crisi financièra de 2008. Atal o demandèt dissabte passat, en disent que las bancas del país devon far “una contribucion fòrça importanta” en escambi del sosten que ne beneficièron alavetz, e qu’ara es ora que tornen als ciutadans portugueses tot aquel sosten.
 
“Cada portugués contribuiguèt per far venir viablas las bancas. En aqueste moment, en sabent que la banca es estabilizada, es l’escasença de redistribuir als portugueses çò que faguèrem”, çò soslinhèt de Sousa davant los jornalistas a Vila Franca da Xira, pendent la visita d’una plantacion de tomatas, interessat per las restriccions del sector agricòla durant lo confinament per empachar l’espandiment de la Covid-19.
 
 
Reünion amb las bancas
 
“L’economia a de besonh d’argent lèu-lèu, las familhas an de besonh d’argent lèu-lèu, los obrièrs an de besonh de trabalhar lèu-lèu, de salaris lèu-lèu. Aquesta lucha es tanben de las bancas”, çò defendèt. Per aquela rason, Marcelo Rebelo de Sousa tenguèt diluns passat una reünion per videoconferéncia amb los presidents de las cinc principalas bancas del país.
 
 
Bona gestion de la crisi santiària
 
Portugal es un dels païses qu’an melhor gerida la crisi sanitària que sèm a patir. Sas bassas chifras d’infeccions e de mòrts contrastan amb las d’Espanha, qu’es lo país qu’a lo percentatge de mòrts pus naut del Mond. Lo govèrn decidiguèt d’aplicar l’estat d’urgéncia e de confinar la populacion quand comptava a pena 50 cases de la Covid-19 e cap de mòrt, en barrant la frontièra amb Espanha, un estat qu’esperèt de comptar 4200 infectats e 120 mòrts per prene de mesuras mens restrictivas.