An expulsat de lor ostal a Montpelhièr una infirmièra de 37 ans e son companh. Los proprietaris, inquiets que los locataris sián contaminats pel coronavirus, an emplegat totes los mejans per los embandir en plen confinament. Li dison Mélina Florès e es infirmièra anestesista al blòc operatòri e al servici de reanimacion de l’espital La Peironiá de la capitala del Bas Lengadòc. Ela e son concubin quitèron l’apartament lo diluns 30 de març.
 
Los proprietaris abitan al primièr estanci d’un grand ostal copat en dos, dont lo planpè èra logat a l’infirmièra e a son parelh. L’infirmièra a raportat a La Gazette de Montpellier una situacion insuportabla. De matin, fasián de bruch per los revelhar en tot cridar: “Nos en batèm s’agantatz lo virus e morissètz tant que morissètz pas en cò nòstre”. Lor avián quitament copat l’aiga cauda e lo calfatge per los forçar de partir. Al moment de partir encara deguèron suportar quicòm mai: “M’an dich que farián desinfectar l’ostal e que lo montant de la factura seriá retengut sus nòstra caucion”, çò expliquèt la femna als jornalistas. “Çò piéger, es qu’al començament del confinament, lor fasiam lors crompas per que sortiguèsson pas d’en cò sieus”, çò precisèt Florès.
 
Expulsats, lo parelh anèron demorar dins l’apartament que l’a logat la filha de Mélina, una femna de 20 ans que ten un enfant de tres ans. Mas aquí i aguèt tanben de complicacions.
 
La maire de Mélina Florès, que se trobava dins una residéncia de retirada, patís una malautiá pulmonara. “La directriz de l’establiment me recomandèt vivament de la recuperar”, çò conta Florès al mèdia montpelhierenc. Per tant, cabián dins un ostal de 100m² Mélina Flores, son companh, sa maire, sa filha e sa felena. Una situacion qu’agradèt pas brica als proprietaris de l’apartament. “Aquelas gents devián pas venir en cò nòstre. L’arrendament èra per doas personas mas ara es una invasion”, çò dison los proprietaris a La Gazette de Montpellier que crenhián que l’infeccion del coronavirus lor arribèsse tant del costat de l’infirmièra coma de la maire. “Voliam pas aquò en cò nòstre”, çò afirman.
 
Fin finala, Mélina Florès a beneficiat d’un Airbnb gratuit e a degut reconduir sa maire a l’ostal de retirada. Son concubin es tornat demorar en cò dels parents.
 
Mentretant, los proprietaris del planpè ont demoravan Florès e son companh publicavan una anóncia de locacion l’endeman de l’embandiment.
 
Es pas lo primièr cop qu’una infirmièra es obligada d’abandonar son lotjament en plen estat d’urgéncia per la pandemia de la Covid-19. A Tolosa, una infirmièra foguèt tanben expulsada de son ostal fa qualques jorns per la mateissa rason que Mélina Florès. E i a mai de cases.
 
 
 

 
 

"C’est honteux, c’est lamentable" : le désarroi de Mélina, infirmière à Montpellier, expulsée de son domicile à cause de ses propriétaireshttps://t.co/UgznOjGCG8pic.twitter.com/dIDp1uHFDA

— franceinfo (@franceinfo) April 3, 2020

 
 

"Elle a dit qu'on pouvait attraper le virus, c'était pas son problème."
Infirmière à #Montpellier, Mélina a été chassée de son logement par sa propriétaire.
L'épidémie de #coronavirus est aussi révélatrice du pire de la nature humaine.#COVIDー19#COVID19pic.twitter.com/K57GOLnfnN

— (@Callystor) April 2, 2020