Lo president del Conselh Europèu de la Recèrca (ERC segon sa sigla en anglés), Mauro Ferrari, a demissionat per la manca de coordinacion e d’iniciativas de la Comission Europèa a l’ora de luchar contra la pandemia del coronavirus 2019. Lo primièr de genièr, Ferrari aviá pres possession de sa carga, la pus nauta de l’encastre scientific dins las institucions europèas. Mas ièr mandèt una letra de demission a la presidenta Ursula von der Leyen. “Soi extrèmament decebut per la responsa europèa a la Covid-19”, çò diguèt dins un comunicat que publicava The Financial Times.
 
“Arribèri a l’ERC coma un afogat de l’UE, mas la crisi de la Covid-19 m’a fach cambiar d’a fons de vejaire, e mai contunhe de sosténer amb entosiasme los ideals de collaboracion internacionala”, çò ditz. Coma o explica, Ferrari aviá prepausat un programa especial per combatre la pandemia, mas trobèt lo refús de l’institucion: “Pensèri qu’a un moment coma aqueste los melhors scientifics del Mond devián aver los recorses e las oportunitats per luchar contra la pandemia amb de nòus medicaments, de nòus vaccins, de nòus espleches diagnostics, de nòus apròchis dinamics de conducha basats sus la sciéncia, per remplaçar las intuicions tròp improvisadas dels dirigents politics”.
 
Malgrat la gravetat de la crisi sanitària, Ferrari ditz que l’organ de govèrn de l’ERC considerèt que sas competéncias permetián solament de finançar la recèrca scientifica “d’en bas en naut”, en luòc d’impulsar de programas pus grands “d’en naut en bas”, amb de tòcas marcadas pels dirigents de l’UE. “Respondèri qu’èra pas lo moment de s’inquietar gaire de las diferéncias subtilas entre las recèrcas d’en bas en naut e las d’en naut en bas”, çò ditz.
 
Ferrari explica qu’aguèt una segonda escasença quand Ursula von der Leyen li demandèt son opinion sus cossí combatre la pandemia, e qu’el dessenhèt un plan “qu’ela i contribuiguèt amb de directivas substancialas”. “Lo fach qu’ela aguèsse trabalhat dirèctament amb el descadenèt una tempèsta politica”, çò ditz. Atal, Ferrari explica que la proposicion passèt per mai d’un filtre de l’administracion de la Comission Europèa, “ont cresi que se’n desactivèt l’impacte”.
 
 
Segon la Comission l’ERC èra pas d’acòrdi amb Ferrari
 
Après la demission, un pòrtavotz de la Comission Europèa a plangut lo renonciament de Ferrari e a justificat l’institucion en tot dire que i a cinquanta projèctes de l’ERC aviats o ja completats per respondre a la Covid-19. Lo vejaire oficial es que los membres de l’organ de govèrn de l’ERC èran pas d’acòrdi amb l’idèa de Ferrari de se concentrar a donar una responsa de cort tèrme de la pandemia perque —çò dison— i a d’estructuras de l’UE mai adaptadas per o far.
 

Mauro Ferrari, head of the European Union’s top scientific research body, has quit after 3 months in the job because he is “extremely disappointed” in the EU’s response to the coronavirus pandemic https://t.co/OaSxhJPwpkpic.twitter.com/cBHSUiHG90

— Forbes (@Forbes) April 8, 2020