La crisi sanitària que sèm a patir a permés a las grandas fortunas de redaurar lor imatge a còps de dons de milions d’èuros, de mascas e de gèls idroalcolics. Un reportatge de Reporterre detalha aqueles miliardaris qu’enfilan “lors vestits d’eròis per ajudar als servicis publics a luchar contra la pandemia. De filantròps tanben coneguts per lors estrategias d’evitament de l’impòst, responsables en partida de la degradacion actuala del sistèma de santat”.
 
Lo reportatge detalha coma aquelas grandas fortunas an profechat de l’escasença, mai que mai las francesas coma LVHM, proprietat de Bernard Arnault, que faguèt un don de gèl idroalcolic a las autoritats sanitàrias francesas; o coma la banca Crèdit Agricòla venguda  un provesidor de mascas o encara un avion mercand afretat pel grop Bolloré.
 
Lo reportatge tanben mençona, demest d’autres, lo grop Kering, dels fraires Pinault, que donèt dètz milions d’èuros als espitals italians o lo grop BNP-Paribas que provesiguèt d’un milion de mascas los espitals parisencs e d’un milion d’èuros l’institut Pasteur per l’ajudar a trobar un vaccin.
 
D’ajustar Chanel e son don d’1,2 milion d’èuros a divèrsas institucions sanitàrias e encara Total qu’an donat 50 milions d’èuros de carburant al personal espitalièr. La societat telefonica Bouygues a liurat un milion de mascas, Sanofir es lèst per ofrir de Plaquenil —la potinga que conten la renomenada idroxicloroquina—, L’Oréal a lançat un “plan solidari europèu coronavirus” e la Societat Generala amb un programa de solidaritat de 50 milions d’èuros.
 
Reporterre analisa tota aquesta èrsa de caritat interessada, mascada de solidaritat. Entre d’autres exemples soslinha la mobilizacion del personal espitalièr de Lesinhan (Corbièras) qu’exprimiguèt sa colèra en qualificant de “vergonha” las cridas als dons, en citant los 100 miliards d’evasion fiscala que registra l’estat francés cada an, la baissa de l’impòst sus las grandas fortunas... vejatz la pagina Facebook de la seccion CNT de l’espital de las Corbièras.