Ne sauprem probable un pauc mai dins la setmana sus la seguida de la sason tretzista. En Occitània e Catalonha, la tendéncia es a l’arrèst dels campionats d’elèit amb la decision d’una sason blanca, ja presa per totas las autras competicions (federalas, femnas, joves, cadieral).

Lo pati en Austràlia
 
De declaracions en comunicats, se compren pas grand causa a la situacion en Austràlia entre las posicions contràrias e contradictòrias exprimidas per la federacion, los responsables de l’NRL, lo sindicat dels jogaires, las cadenas de difusion tèle e las posicions dels govèrns (del federal e dels poders dels estats de Nòva Galas del Sud e de Queensland). Las questions pòrtan sus las finanças, lo salari dels jogaires, sus un campionat en doas polas, l’installacion provisòria dels NZ Warriors en Australia, lo calendièr, la presa en compte o non dels punts de las doas jornadas faitas abans la decision de confinament…
 
 
Solidaritats anglesas
 
Los clubs angleses prenon de mesuras de solidaritat: dobertura de canhòtas, ofèrta de plaças pel personals espitalièrs per Warrington o Salford. Los clubs benefícian del sosten de Sky-Sports qu’a decidit de faire los pagaments previstes a las federacions que n’assegura de retransmissions de partidas.
 
 
Cosinatz amb los Dragons
 
A Perpinhan, los Dragons Catalans lançan tanben una canhòta per ajudar los espitalièrs de la vila. Sul sit del club, dos jogaires vos prepausan lor recèpta de cosina per un temps de confinament. Foad Yaha se lança dins la preparacion d’un tiramisu e, francament, nos agrada mai de lo veire córrer long de la tòca amb la palma jol braç! Son collèga Miquèl Godemand vos prepausa de manjar de polet amb espècias, patatas doças e cogordetas.
 
 
 
 
Alan Roch