A comptar del 1r de julhet de 2013, los parents chineses poiràn atacar sos enfants en justícia s’aqueles van pas los visitar “sovent”.
 
Confrontat a una inflacion del nombre d’ancians, lo govèrn chinés a causit de n’apelar a la solidaritat familiala tradicionala per dire de resòlvre lo problèma. S’estima de fach que, en 2030, i aurà mas de 30% de la populacion (çò es mai de 400 000 000 de personas) a la retirada.
 
Los amators de la cultura chinesa tradicionala se membraràn bensai del capítol 3 del roman, Sièis capítols d’una vida flotejanta^[1] que l’eròi es amenaçat d’un procès per son paire per encausa de manca de pietat filiala.
 
La politica de l’enfant unic a foncionat parcialament e la baissa de la natalitat es estada pro rapida per que la question que se pause ara siá subretot la de la gestion d’una populacion envielhida.
 
De segur, la lei demòra encara pauc clara sus las sanccions en cas d’infraccion, atal coma sul concèpte de “sovent”. Totun, revèrta la preocupacion creissenta del govèrn per las questions de l’envielhiment que riscan de pesar fòrça sus la competitivitat del país dins los ans que venon.
 
 
 
 
Simon Montsegur
Universitat normala d’Anhui
 
 
_____
^[1] Títol original:浮生六記, pinyin: Fú Shēng Liù Jì