Cinc ans après lo chaple qu’i faguèt l’autoproclamat Estat Islamic, la preséncia d’assirians a Khabur es menaçada. Solament lo 6% dels membres d’aquel pòble son tornats dins aquela val del nòrd de l’estat sirian, çò rapòrta Nationalia que mençona un rapòrt de l’Assyrian Policy Institute qu’avertís de la destruccion de lor patrimòni material e immaterial e assegura que serà complicat de rebastir la comunautat se se crèa pas las condicions per qu’i pòscan tornar.
 
Los assirians s’installèron dins la val de Khabur dins los ans 1930. Èran de familhas expulsadas de la region de Hakkari, al Curdistan del Nòrd (Turquia). Abans la guèrra actuala, s’estimava que la populacion assiriana sul territòri de Khabur èra d’aperaquí 20 000 personas.
 
Lo rapòrt demanda que l’UNÈSCO entamene una enquista suls eveniments e sollicita dels govèrns de Siria, Iraq, Turquia e Iran que reconescan lo pòble assirian coma pòble autoctòn e ne protegiscan las lenga e cultura. En mai d’aquò, se demanda a l’ÒNU e la comunautat internacionala de fonzes per restaurar los edificis destruches e preservar la cultura dels pòbles atacats per l’Estat Islamic.
 
Los assirians, eiretièrs d’una de las civilizacions mai ancianas de l’umanitat, son majoritàriament crestians, e foguèron tanben de victimas del genocidi de 1915. Dins aquel chaple se calcula que los otomans tuèron 1,5 milions d’armènis e 300 000 assirians. La populacion assiriana actuala dins l’estat turc es fòrça reducha e concentrada dins las grandas vilas, majoritàriament a Istambol. Son tanben estats una de las butas de l’autoproclamat Estat Islamic.
 
D’autres territòris del Curdistan Occidental tenon tanben de populacions assirianas mai petitas, coma la vila de Qamishli. En 2014, las autoritats de Cizîre declarèron l’assirian lenga oficiala del canton, amb lo curd e l’arabi.
 
Al començament de 2017 tanben las autoritats de Turquia enreguèron una autra campanha de persecucion dels assirians.
 
 

Learn more about the destruction of Assyrian intangible cultural heritage in Khabour in our new report. https://t.co/wnyLwwgjwk

— Assyrian Policy Institute (@AssyrianPolicy) April 7, 2020

 

An Assyrian-populated Syrian valley underwent ISIS's occupation in 2015. Most Assyrians fled. 5 years later, a mere 6% of the original population lives there.

A new @AssyrianPolicy report warns that Assyrian life might never be rebuilt there:https://t.co/LMZciYQXTcpic.twitter.com/YaGPRiMERW

— Nationalia (@Nationalia) April 9, 2020