Dijòus que ven, los catalans poiràn pas festejar coma cal la fèsta de Sant Jòrdi, jorn de l'amor, dels libres e de la cultura. Un jorn que normalament es obrant mas que cada annada deven una de las fèstas mai popularas, polidas e exportadas del pòble catalan. Per tant, ongan, lo 23 d'abril las carrièras de Catalonha seràn pas conflas de taulièrs de libres, ni d'escrivans que signen ni de mond que s'ofriscan de libres e de ròsas. Mas an espelit un fum d'iniciativas alternativas per festejar la jornada virtualament. Ne volèm metre en valor las que tòcan la cultura occitana.
 
Catalonha a reportat al 23 de julhet la fèsta de Sant Jòrdi que se deuriá tenir dijòus que ven, çò que plusors ostals d'edicion refusan en prepausant d'alternativas en linha. Tanben de productors de flors prepausan una campanha per portar de ròsas als ostals, çò que qualques vendeires de flors an criticat. En tot cas, dijòus que ven, 23 d'abril, los catalans festejaràn, de qualque biais, la diada de Sant Jòrdi.
 
 
Lo CAÒC recomandarà de libres en occitan
 
Quant als libres en occitan, lo CAÒC partejarà long de la setmana que ven de recomandacions de libres que se poiràn crompar al sit social de l'associacion d'amistat occitanocatalana quand tornarà dobrir, o ben que se mandarà per la pòsta. De seguir lo sit web del CAÒC, son compte sus Twitter, sus Facebook o sus Instagram.
 
 
Sant Jòrdi confinat sus Jornalet
 
Quant Jornalet, seguirem la meteissa iniciativa en tot publicar un article amb nòstras recomandacions de libres, amb un vejaire mai que mai aranés, que los legeires de la rèsta d'Occitània poiràn completar dins los comentaris.
 
 
Eth Ligam Occitan organiza un tiratge al sòrt
 
La còla d'Eth Ligam Occitan, organiza aqueste còp una campanha per far conéisser Occitània al public catalan. Pendent tota la setmana publica sus Twitter d'informacions en catalan sul prètzfach dels divèrses projèctes de l'associacion ADÒC que tanben fasèm Jornalet. Dimècres que ven se farà un tiratge al sòrt d'un lòt de dos libres avalorat a 50 èuros. S'agís del segond volum de l'istòria de la cosina occitana e catalana de Vicent Marqués e del libre de Mireia Boya Trencar el silenci.
 
Eth Ligam Occitan es un projècte de pichons vidèos cairats e legibles que cèrca de sarrar del public aranés la rèsta de la realitat culturala occitana.
 
 
Cossí participar al tiratge
 
Per participar al tiratge al sòrt que l’organiza Eth Ligam Occitan, cal aver un compte de Twitter e i remandar la fiulada seguenta abans lo 21 d'abril:
 

#sorteig#santjordiacasa
RT i segueix-nos per a guanyar #Llibres
'Història de la cuina catalana i occitana vol.2' de Vicent Marqués.
'Trencar el Silenci' de @yeyaboya.
A l'ADÒC donem suport als autors afins a la Val d’Aran!
Bases: https://t.co/PtUx5UMuPT
(Més) pic.twitter.com/qEwTSmyS2r

— EthLigamOccitan (@ethligamoc) April 14, 2020

 
Se cal assegurar que lo participant seguís lo compte de @EthLigamOc.
 
Lo tiratge se tendrà lo 22 d'abril per mejan d'una aplicacion informatica especializada en tiratges al sòrt e verificabla.
 
Lo prèmi es un lòt de dos libres avalorat a 50 èuros.
   
Lo 24 d'abril, se tendrà un segond tiratge per un autre exemplar de Trencar el Silenci.