L’estat espanhòl es lo qu’a mai d’artistas embarrats en preson, segon las donadas de 2019 que publica Freemuse, una organizacion internacionala que defend lo drech de liura expression artistica. Espanha es en tèsta del classament amb 14 artistas encarcerats, seguida d’Iran amb 13, de Turquia amb 9 e de Birmania amb 8. Freemuse a analisat 700 cases de tot lo Mond e a identificat un total de 71 artistas empresonats, la majoritat per “aver criticat lo govèrn”. Ça que la, per Freemuse Espanha es pas entre los païses ont la libertat d’expression es pus violada, mas si qu’i son França, los Estats Units e Turquia.
 
L’organizacion explica que los 14 artistas encarcerats dins l’estat espanhòl i son per “un marrit usatge de las leis antiterroristas” e denóncia de “definicions ambigüas de terrorisme” que permeton a Espanha e a Turquia d’enseguir d’artistas.
 
L’eurodeputada catalana Diana Riba a anonciat que portarà lo rapòrt de Freemuse a la Comission Europèa “per saber çò que pensa d’aquelas donadas tant inquietantas e, sustot, per saber çò que farà per protegir la libertat d’expression artistica en Euròpa”.