Passar enlà de las circonstàncias qu’èm a víver que paréisher d’estar lo prètzhèit màger per aquestes torns, com sofrir l’embarrament e non pas pèrder lo ligam dab ua comunautat. Au parat de las setmanas passadas embarrats (tà la màger part), qu’avem vist hèras iniciativas qui tiran a respóner ad aqueth prètzhèit: amassar lo monde. L’iniciativa Geekem dab Diu Negre que vadó d’aquesta volontat. Ua volontat aviada peu grop Facebook Videojòcs, pensat e aviat per Danís Chapduelh. A la diferéncia qu’aqueth grop qu’amassa un public hèra especific: los geeks occitanofòns. E be n’i a! Uei, lo grop qu’amassa ua cinquantena de personas qui partatjan un interès deus grans entaus jòcs vidèo (quins que siin). Amassar un public qu’èra la purmèra piada suu camin. Lo public amassat, que’u calèva neurir.
 
Atau, mantua iniciativa qu’estón aviadas entà perméter au public d’escambiar las lors experiéncias e partatjar a l’entorn d’aqueth subjècte. La tuta del Gamer per exemple, ua iniciativa de las interessantas qui gaita los jòcs accessibles a la comunautat e qui s’assegura que posqui profieitar de las escadenças suu mercat videoludic. Geekem dab Diu Negre, que hè partida d’aqueras iniciativas.
 
Lo principi qu’ei pro simple. Lo collectiu Diu Negre que causeish un jòc (recent o non) e que’u presenta au public mercés a un vidèo (de 30 a 40 minutas maximum). Lo purmèr vidèo (dejà accessible suu grop Videojòcs o suu site Diu Negre) que presenta un jòc que sòrt de paréisher: Mount & Blade II: Bannerlord de Taleworlds. Que n’i a d’autes que son a l’enregistrament e qui sortiràn drin a drin.
 
Divertir e informar a despieit de las circonstàncias. Mantiéner lo ligam, qu’ei estat de tostemps enlà lo noste prètzhèit. Que ns’i tieneram, tostemps en occitan!
 
 
 
 
Diu Negre