Polemica en seguida de la mòrt de l’ors Cachou, que lo trobèron fa qualques jorns mòrt a Les (Quate Lòcs). Quatre associacions ecologistas an demandat una segonda necropsia que permeta d’esclarzir las causas de la mòrt, e acusan lo Conselh General d’Aran de privilegiar una version interessada de la mòrt del plantigrad.
 
La primièra necropsia facha del còrs de l’animal a pas portat de resultats conclusents. En seguida, lo govèrn d’Aran a raportat que la possibla causa de la mòrt de l’ors foguèt una casuda de 40 mètres après l’ataca d’un autre ors. Mas los collectius Ipcena, Seo Birdlife, Fapas e la Federacion Ecologista de Catalonha demandan una segonda necropsia e que se torne analisar las rèstas del cadavre. Los ecologistas creson que l’ors moriguèt empoisonat car son còrs presentava pas de feridas de cap d’ataca ni lo sorire sardonic que mòstran los mamifèrs quand morisson empoisonats.
 
Lo Conselh General d’Aran a reconegut qu’en octòbre passat apliquèron de produches quimics a una carronha que la mangèt l’ors per li provocar de vòmits e lo persuadir d’atacar pas pus d’animals. L’usatge d’aqueles produches quimics inquieta las associacions ecologistas; creson qu’es çò qu’auriá tuat l’ors e crenhon qu’aja d’efièches nocius sus d’autras espècias.
 
Lo pòrtavotz del grop ecologista Ipcena, Joan Vázquez, va mai luènh. Recòrda que l’usatge de produchs quimics es una “autentica barbariá” que damatja la biodiversitat, e ditz sens sal ni pebre que las autoritats aranesas poirián aver comés un delicte.
 
 
Un ors agressiu que n’avián demandat l’extraccion
 
Se parlèt fòrça de Cachou a causa de sas atacas. Lo sindic d’Aran, Francés Boya, exigiguèt en setembre “era extraccion immediata der os Cachou”. Divèrsas manifestacions de païsans e elevaires o demandèron tanben. Las autoritats de la Generalitat de Catalonha responsablas del programa de la reïntroduccion de l’ors dins los Pirenèus avalorèron aquela possibilitat. Mentretant, apliquèron a una carronha un fungicida que li provoquèt de vòmits. Aquò lo persuadiguèt d’atacar pas pus d’animals e a partir d’octòbre n’aviá pas agarrit cap d’autre. Òr, aquel metòde poiriá èsser al centre de la polemica.
 
 

Era necròpsia de Cachou, realizada peth servici d’Ecopatologia de Fauna Sauvatge dera UAB, apunte de manèra preliminar que poirie auer estat atacat per un aute os e que queiguec d’uns 40mhttps://t.co/iTos46iORbpic.twitter.com/75177ICN3C

— Conselh Generau Aran (@conselharan) April 14, 2020

 

Era associacion ecologista IPCENA considère que non ei credible er informe qu'a hèt era Universitat Autonòma de Barcelona sus era necròpsia de Cachou.
Aciu pòs escotar era crònica: https://t.co/yg1vWv9zoZpic.twitter.com/8EbohWTDPC

— CatInfo Aran (@cati_aran) April 15, 2020

 

Era associacion ecologista Ipcena considère qu'era version aportada peth Conselh Generau sus era mòrt de Cachou ei inventada. Afirmen qu'ei impossible qu'er exemplar queiguesse pendent 40 mètres per un terrenh abrupte e non i auesse cap tipe de lesion:
https://t.co/DKaxDIlaJ3pic.twitter.com/wg6qeM0NCK

— CatInfo Aran (@cati_aran) April 17, 2020

 

#Pyrénées : l'#ours Cachou a-t-il été empoisonné ? https://t.co/Q9az7JlsG6 via @lindependant

— L'Indépendant (@lindependant) April 18, 2020