Environ 100 000 refugiats sirians que se trobavan dins los camps de refugiats d’Idlib, près de la frontièra amb l’estat turc, an decidit de tornar a lors ostals per paur del coronavirus. Siá demòran dins la promiscuitat dels camps de refugiats sens ressorsas, ont l’arribada de la pandemia poiriá far d’estralhs, o tornar a l’ostal malgrat un alta-al-fuòc fragil.
 
Per tant, dins los darrièrs jorns, aquela província rebèlla del nòrd de Siria s’es tornada emplir de camions e forgonetas e de caminaires en direccion de l’ostal. Mas maites en arribant s’avisan que lors lotjaments existisson pas pus.
 
“Aviam paur que lo coronavirus se propaguèsse dins lo camp a causa de la promiscuitat, per aquesta rason tornèrem. E mai s’avèm l’ostal destruch, viurem dins los tarcums”, çò testimònia Hassan Khraiby als mèdias.
 

VIDEO: His home in volatile northwest Syria may have been destroyed, but Hassan Khraiby decided returning to his bombed out town of Ariha in Idlib province was better than risking his 10 children catching the novel coronavirus in a cramped displacement camp pic.twitter.com/E2d3Nb6XMp

— AFP news agency (@AFP) April 17, 2020

 
 
19 infectats coma donada inquietanta
 
Oficialament, i a pas cap de cas confirmat de Covid-19 dins aquela region del nòrd-oèst de Siria, e dins tot l’estat sirian se compta solament 19 infectats segon las donadas oficialas del govèrn de Bashshar Al Asad. Mas aquelas donadas son pas gaire tranquillizantas se prenèm en compte que los espitals son destruches e los camps de refugiats desbordats. Dins aquel encastre, la mendre epidemia poiriá venir un desastre umanitari enòrme.
 
 
Preferisson lo coronavirus als bombardaments
 
Mentretant, dins aquela region del nòrd de Siria, los abitants espèran que lo chepic mondial pel coronavirus s’esperlonge lo mai de temps possible. Per eles, la crisi sanitària a entraïnat un arrèst dels bombardaments.