Lo Comitat Clandestin Revolucionari Indigèna de l’armada Zapatista (EZLN) anoncièt lo 16 de març passat lo barrament de lors centres de resisténcia en Chiapas, dins lo sud de Mexic, davant la pandemia de la Covid-19. Dins un comunicat signat pel soscomandant insurgent Moisés, l’EZLN demandèt als conselhs de govèrn e a las comunas zapatistas de barrar immediatament lors vilas e vilatges que son de centres de resisténcia e rebellion per protegir la populacion, en considerant que lo govèrn de Mexic preniá pas las mesuras pertinentas. A mai, l’organizacion zapatista anoncièt que fariá arribar a totas las comunautats una tièra de mesuras d’igiène per evitar las infeccions.
 
D’autre caire, lo comunicat fa tanben una crida generala a oblidar pas la lucha contra la violéncia feminicida, a contunhar la lucha en tot defendre la tèrra maire e a se batre pels desapareguts, assassinats e encarcerats. “Cridam a pèrdre pas lo contacte uman, mas a cambiar temporàriament las manièras per nos saber de companhas, de companhs, de sòrres e de fraires”, çò ditz, a la fin, lo comunicat.
 
Après 26 ans de soslevament en Mexic, aquel movement indigenista e anticapitalista resistís totjorn dins lo sud-èst de l’estat de Chiapas. Aqueles territòris s’organizan normalament coma de municipalitats autonòmas autogeridas per lors abitants o ben aculhisson d’organismes regionals del govèrn indigèna.
 
 

 
 
 

fffff		fffff
	De mesuras en 9 lengas autoctònas   De son caire, lo secretari governamental de la santat de l’estat de Chiapas, José Manuel Cruz Castellanos, anoncièt que dins l’estat se manteniá l’informacion del coronavirus en 9 de las 12 lengas autoctònas que se comptan dins l’estat.