Arribam pas de nos acostumar a anar pas a l’estadi lo dissabte o/e lo dimenge, de pas pus seguir las partidas de l’NRL lo matin del dijòus al dimenge: totas las redifusions possiblas e vesiblas (veire: treizemondial.fr) nos noirisson un pauquet mas pas tant coma de seguir amb los uèlhs e la paraula, sens doblidar los passatges a l’estanquet, los rescontres de XIII. D’unes te dison que i a de causas plan mai importantas dins la vida; probable qu’an pas jamai mes los pès dins un estadi!
Sason blanca
Sens suspresa, aprèp lo discors del president de la Republica del diluns (sens moleta) de Pascas e aprèp la consultacion dels clubs, lo burèu executiu de la Federacion decidiguèt dimars de vèspre l’arrèst de totas las competicions e decretèt la sason blanca: pas de venceire de la Copa, pas de campion dins cap de las divisions.
Las esquipas auràn de problèmas financièrs: las entrepresas que los sostenon son a l’arrèst, quinas ajudas contunharàn de mandar las institucions territorialas e estatalas? Quinas seràn las mesuras arrestadas e obligatòrias per la frequentacion dins los estadis e lo manten d’una distanciacion de mal imaginar?
Grisalhas en Anglatèrra e en Austràlia
La question de las represas de las competicions contunhan de se pausar pels grands campionats professionals tretzistas.
Superliga e Championship considèron una represa a la fin de mai o a la debuta de junh. Dins las ipotèsis, la tenguda de la Dimenjada Magica a Wembley a la data qu’èra prevista per la finala de la Cup; la finala de la Cup a Manchester en octòbre (a la data de la finala prevista per la Superliga) e una finala de la Superliga dins l’estadi de Tottenham en novembre. Mas tot aquò demanda confirmacion.
La marca dels balons Steeden lança una palma que la venda anirà al personal espitalièr brtannic.
En Austràlia, la situacion es totjorn tan complicada entre l’NRL, la Federacion, las autoritats e los difusaires; pichonas frasas, decisions contradictòrias, proposicions seriosas o pas… Lo difusaire Channel-9 trigòssa dels pès per reprene la difusion de la competicion e per dobrir lo pòrtamoneda. Lo director general de l’NRL Todd Greenberg ven de demissionar aqueste diluns de son pòst amb efièch immediat. Aquí se paga lo passatge a una vision virada cap a las finanças de l’espòrt que presiquèt a l’emergéncia de l’NRL: una situacion que ramenta la del fotbòl o del XV, una situacion ont se parla mai de business-plan, de contractes, de dreits televisats que de passas crosadas, de cargas dels pilars o de corsas dels tres-quarts.
Del costat d’Auckland, los Warriors sabon que se poiràn installar per un temps en Austràlia en esperant la normalizacion dels viatges entre los dos païses.
Lo negre a Limós
A Limós, se plora lo Jò Guiraud mòrt aqueste divendres a l’atge de 91 ans.
Enfant de Corbièras, Jò èra, a 38 ans, l’entraïnaire-jogaire de la formacion de 1968 que ganhèt lo primièr bloquièr del club dins la finala istorica fàcia a Carcassona dins l’Estadium de Tolosa. Mièg de mesclanha, portèt tanben lo malhòt tricolòr associat a Antòni Jimenez o a Gijon Benausse. Joguèt unas partidas de Limós amb son filh Arvèi, desaparegut fa qualques annadas. Una brava pagina de l’istòria del XIII se vira amb aquela desaparicion.
Alan Roch
Imatges:
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Avèm l'astre d'aver un occitanista que gausa parlar de totas sas passions en lenga nòstra !
Mercé a l'Alan de ligar rugbi de XIII e Lenga Occitana d'un biais tan natural !
Amai lo sens es evident, que l'istòria d'aquel espòrt e lo de la lenga an de nombrosas ligasons.
Als autres esportius de jogar !
Del costat dels trezistas fasèm lo mestièr i a plan de temps e tre de podèm parlar de la disciplina a la ràdio, a la television o suls jornals de totas menas ba fasèm !
Amics, dintratz dins la dança ! Quora i aurà tròp d'occitan lançarem una crida mas i a encara de plaça !
Lo poton confinat
Tenètz vos fièrs e valents, e tan que farem aital....
JF Albèrt
Bona question. Aimariái plan que i agèsse une version esportiva del Jornalet : i a de que parlar d'els espòrts sul territori occitan, que siague del professional e de l'internacional a las practicas individualas e localas, del fòbal a la corsa camarguesa, del ciclisme (ongan, lo Torn de França serà (se es) gaireben un Torn d'Occitania) a la Marseillaise de petanca. Se deu plan trapar d'esportius e d'afogats que sabon escriure la lenga per tal o tal espòrt, per lo veire jos un angle occitan.
A tu, a vos, a elas e eles de jogar e d'escriure... Es un bon exercici d'escritura.
Ieu, fa temps que fau aquò : cronicar en òc (o en francés) sul XIII : aquesta cronica internet passa tanben sus Ràdiò-Lenga d'Òc-Narbona e Ràdio-Lengad'Òc-Erau (Lo XIII, aquò òc !) ; publicacion de 3 libres sul XIII per l'IEO-Aude ; redaccion del lexic occitan dels rugbís...
De mai, coma las sasons del XIII son diferentas dins los dos emisfèris, avèm de que parlar tota l'annada.
Per l'ora, la situacion es un pauc complicada amb la suspension de las competicions. Mas aquò empacha pas : a dimars que ven !
Perqué lo jornalet parla sonque deu rugbi de XIII ?
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari