La Veu del País Valencià(La Votz del País Valencian) es lo nom d’un nòu jornal numeric qu’es sortit lo primièr jorn de 2013. Segon Moisès Vizcaino, coordenaire e sòci fondador, s’agís d’un portal per “vertebrar lo País Valencian e contribuir al cambiament social dempuèi l’encastre numeric”, al delà d’ocupar un espaci comunicatiu “ideologicament plaçat a esquèrra e dins lo nacionalisme”, çò diguèt al jornal catalan Vilaweb en octòbre passat.
 
Lo novèl mèdia independent espelís amb la volontat de presentar los tèmas e los collectius desfavorizats dins los mèdias del País Valencian, e aital rebatre sus Internet “la realitat del territòri, raportar e balhar de vejaires sus aqueles afars publics que son pas publicats dins los autres mèdias, o denonciar las injustícias qu’afèctan los ciutadans valencians”.
 
L’estructura de La Veu del País Valencià es fòrça semblabla a aquela de Jornalet. Pasmens, amb los airals mai convencionals de l’actualitat, de las opinions e dels blògs, tanben i a de seccions participativas, un jornal per las minoritats de l’encastre associatiu e un espaci per la participacion dirècta dels legeires.
 
La linha editoriala del jornal se basa sus la defensa e l’exigéncia de quatre valors essencialas: “los dreches umans; la patz e la non-violéncia; lo respècte per la natura e l’environament e mai per la cultura, la lenga, lo patrimòni e l’istòria del País Valencian”.
 
Lo finançament d’aquel nòu jornal compta amb un capital inicial e se vòl centrar sus de dons petits. Ça que la, los contenguts seràn totjorn accessibles, coma se passa dins Jornalet.