A escotar lo moisset me demandi sul pic: “Ont es l’enemic?” Escampi un uèlh per carrièras, pas de militars, de jeeps, de tancs... en matèria de guèrra, en França, sèm desgordits... sèm desgordits... sabèm nos i preparar! Sovenètz-vos, en 1870, fàcia a Prussa, èrem pas prèstes! Mas, segur, nos deviam aprestar ... nos deviam aprestar per aquela de catòrze!... A la guèrra de catòrze, aqueste còp nos anàvem aprestar per aquela de trenta nòu... Mas, quora arribèt aquela de trenta nòu... èrem pas melhor aprestats que per aquela de quatòrze... Mas per aquela de dos mila vint, soi rassegurat! Soi rassegurat! Los temps an cambiat, sèm venguts modèrnes... sèm modèrnes... amb totes los politicians, los mètges, los cercaires, los informaticians, los militars, e lo numeric... totas e totes tant saberuts los unes que los autres, pòdi aver fisança! Pel primièr còp, dempuèi de sègles, sèm prèstes per afrontar aquela guèrra! Quora aprenguèri qu’anàvem èsser confinats, foguèri trebolat. Me pensèri: «Trabalhan a rebors . Per las autras guèrras, mandavan los òmes al front, aquí los fan dintrar dins lor ostal! Susprenent, non! Susprenent!»
 
E quora saupèri que l’enemic èra invisible tombèri de cuol! Cossí luchar contra un ennemic que veses pas? Ont serà la linha de front amb un enemic sens frontièras? Almens en 70, en 14, en 39, l’enemic lo vesián, te vesiá. El, per nos veire, nos vesiá! Alara, lo cerquèri l’enemic? Lo cerquèri. Ont es l’invisible? Benlèu lo portavi sus ieu sens me n’avisar. M’examinèri. M’en pòdi pas lavar las mans. Me paupèri, m’espinchèri de las calcetas a la tèsta, lo trobèri pas. Sosquèri e me diguèri: “S’es pas sus tu, benlèu es dins tu!”           S’es dins ieu, pòdi escopir lo virus sens me n’avisar. Una marrana que passa de l’un a l’autre sens èsser vist! Aquela empega! Mas an degut preveire las masquetas. Se’n pòdon pas lavar las mans coma aquò! E puèi, vòli saber se soi coronat o pas coronat. Se soi coronat me vòli far desconorar al pus lèu! Descoroni... pas... E se l’ai pas, me vòli far vaccinar sul pic! Per aquò, me fau pas de lagui. Sabi qu’an previst! Rassegurat m’acorsi a la farmacia per i crompar de masquetas, de GIA, comprenètz: Gèl Idro Alcoolic, me far testar per saber se soi coronat o pas e, se o soi, me far vaccinar.
 
Pecaire! Quora tornèri de la potingariá èri un guerrièr nus, sens armas. Pas de masquetas, pas de GIA, pas de tèst ni de vaccins! Se’n lavan las mans! Ai una pensada per totas las femnas e totes los òmes de nòstre país que, coma ieu, van partir en guèrra. Serem lèu desmascats . De mascas n’avèm pas! Aimam pas la guèrra, es tot!
 
 
 
 
Andrieu Clamenç
Umorista ocitan


 

---

Partejatz lo confinament amb la rèsta de legeires

Encoratjam nòstres legeires a nos mandar de tèxtes, de vidèos, d’imatges o d’àudios sus lors idèas de passar lo confinament. De partejar aqueles moments entre totes nos ajudarà a nos donar d’idèas los unes als autres, e nos coneisserem un pauc melhor.
        
    

fffff		fffff
	Cronicas de l'embarrament A l’iniciativa de sos legeires, Jornalet prepausa de mandar regularament la cronica d’un embarrament. Aquela cronica pòt èsser ficcionala o a mièjas reala, mas es una convidacion a un exercici literari. Daissatz  vòstra imaginacion s’exprimir en una lenga trabalhada, rafinada, afogada. I podètz apondre un imatge. Los tèxtes seràn publicats regularament dins la seccion “Cronicas de l’embarrament”. Escrivètz a info@jornalet...

 
        
    

fffff		fffff		fffff
	Lo confinament dels legeires de Jornalet
			Sès confinat a l’ostal? As, totun, de connexion a Internet? As de bonas idèas per passar lo temps? Jornalet demanda a sos legeires que partegen lors idèas e lor vida en confinament amb un messatge de tèxt, una fòto, un vidèo, un àudio o qué que siá que se pòsca publicar en linha e partejar amb los autres legeires.                                                   As bastit un castèl de carton pels enfants? Fas d’escalada dins la cosina? As organizat un concèrt per videoconferéncia? Tenes una vida sociala sus las fenèstras o los balcons? Fas d’espòrt a l’ostal? As de bons libres a nos recomandar? De bonas idèas per èsser tostemps de bona umor?
	Manda tos documents a info@jornale...                                                   Convivéncia e paratge en confinament.