Eth Sindic d'Aran, Carlos Barrera, a manifestat qu'era Val d'Aran non renóncie cap a èster subsedença olimpica, ena presentacion en Vielha dera candidatura des Jòcs Olimpics d’Iuèrn Barcelona-Pirèneu 2022. Eth burèu olimpic e eth Govèrn d'Aran qu'an acordat que dus representants dera Val d'Aran seràn en ua comission tecnica que definirà tota ua tièra de competicions deth campionat deth Mond e d’Euròpa enes estacions d’esquí deth Pirèneu.
"Es aranèsi non renonciaram ara possibilitat que se celèbre bèra pròva des Jòcs Olimpics en Aran" a dit eth sindic d'Aran, Carlos Barrera, dempús d'ua amassada damb es responsables deth Burèu dera candidatura des Jòcs Olimpics d’Iuèrn Barcelona-Pirèneu 2022. Representants des institucions araneses e dera estacion d'esquí Baqueira Beret an participat ena amassada.
Es responsables dera candidatura olimpica an dit qu'eth país occitan poderie demorar excludit des Jòcs Olimpics pr'amor qu'ei luènh de Barcelona. Totun, segons Barrera "era Val d’Aran non renonciarà a èster subsedença olimpica des Jòcs d’Iuèrn de 2022, e potenciarà era estacion d'esquí Baqueira-Beret entà acuélher pròves de competicions de caractèr internacionau".
Ena amassada s'a decidit de crear ua comission tecnica que definirà tota ua tièra de competicions deth campionat deth Mond e d’Euròpa enes estacions d’esquí deth Pirèneu, ena que i aurà dus representants dera Val d’Aran. Eth sindic confirmèc que sajaràn que bères ues d’aguestes pròves se celèbren ena estacion d'esquí aranesa.
Ena presentacion que i auie tanben eth baile de Vielha, Àlex Moga, qu'a manifestat non compréner ne acceptar que Catalonha dessenhe un projècte d'espòrts d'iuèrn sense tier en compde Aran e Baqueira-Beret.
Era Val d'Aran que sage, dempús de 2008, de hèr part d'aguesta candidatura olimpica.
Ferriòl Macip
En es jòcs olimpics non se pot hèr ua candidatura que comprèn dus estats diferents (Espanha-França/Andòrra), pr'amor que sigam era madeisha nacion!
Amassa damb eth Conselh Regionau de Meddia-Pirenèus (qu'a 26 estacions), eth Govèrn d'Aran que poderie hèr ua candidatura olimpica de mès qualitat e 100% occitana.
E perqué pas una candidature transpirenenca ? Veiriau ben una candidatura Andorra / Aran !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari