capçalera campanha

Actualitats

InternacionalPolitica

Brasil: la justícia expulsa de missionaris de las tèrras indigènas

Lo jutge estima que los religioses ensajan de desculturar los pòbles amazonians e que representan un perilh d’infeccion durant la crisi del coronavirus

Manifestacion de ciutadans de la val de Javari en 2009
Manifestacion de ciutadans de la val de Javari en 2009 | Fabio Rodrigues Pozzebom/ABr
Pel primièr còp en Brasil, un jutge de Tabatinga a enebit qu’un grop fondamentalista crestian apelat Mission Nòvas Tribus de Brasil (MNTB) intre en contacte amb los pòbles originaris de la val de Javari, en Amazonia, çò rapòrta Nationalia. Lo magistrat a pres aquela decision après que l’organizacion Univaja, que recampa plusors pòbles de la val, aja fach sa denóncia contra los missionaris car los vòlon pas dins lors territòris.
 
La val de Javari es un país reconegut legalament coma “indigèna” a l’extrèm occidental de Brasil dins l’estat d’Amazònas, abitat per mai d'un pòble originari, dont qualques unes an pas jamai agut cap de contacte amb d’autras civilizacions. Aqueles pòbles non contactats son la buta de fòrça grops fondamentalistas que cèrcan de los convertir al cristianisme. Survival International avertís qu’aqueles contactes son una violacion del drech d’aqueles pòbles a aver pas de contactes amb lo mond exterior e mai implican un grèu perilh per la santat d’aquelas comunautats en las expausar a de malautiás divèrsas.
 
Concretament, la decision judiciària que sèm a raportar precisa que los religioses ensajan de desculturar los pòbles amazonians e que representan un perilh d’infeccion durant la crisi del coronavirus. Per Survival International s’agís d’una “decision istorica”.
 
Ara, Survival International a reclamat que las autoritats brasilièras fagan complir “immediatament” la decision del jutge e “expulsen” los missionaris de la region. A mai, remembran que lo coronavirus es ja arribat en çò dels ianomamis.
 
 
 
 
 
abonar los amics de Jornalet
 
 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris


I a pas cap de comentari

Escriu un comentari sus aqueste article