Artcai es un simpatic dragon catalan que vesita la mainada dins los divèrses espitals de nòstre país fraire. Naissèt en 2017 en seguida d’un projècte solidari entamenat per d’artistas pintres de Catalonha. Son nom es un acronim d’Art Catalan Internacional, e pòrta un pincèl sus la coa.
 
Dempuèi que nasquèt, lo dragon Artcai se passeja per totes los endreches ont i aja d’enfants, mai que mai dins los espitals, los abraça e lor ofrís los Contes del Dragon. Aqueles contes son sovent pairinats per de comunas, entrepresas, institucions o particulars. Tanben jòga als escacs.
 
 
De contes collaboratius del confinament estant
 
Ara, pendent aqueste periòde de confinament a causa de la crisi sanitària, lo projècte a donat de vida e de vam al vilatge de Cervelló. A l’iniciativa de doas abitantas, 27 associacions e mai d’un centenat d’abitants an jonch lo projècte del dragon Artcai en creant de contes collaboratius. A l’ocasion de la fèsta de Sant Jòrdi an fach, en doas setmanas, 18 vidèos ont explican, de lor confinament estant, los contes qu’an creat totes ensems.