Dins un gèst pas brica abitual, lo maximal dirigent de la Corèa del Nòrd, Gim Jeongeun (o Kim Jong Un), a prononciat per la fin de l’annada un messatge per ràdio e per television. S’agís del primièr discors d’aquela sòrta que s’emet pels mèdias dempuèi dètz e nòu ans. Lo darrièr messatge de Cap d’An se faguèt en 1994 per Gim Ilseong (o Kim Il Sung), lo grand de l’actual dirigent. Lo sieu paire, Gim Jeongil (o Kim Jong Il), parlava pas sovent en public. Dins son discors, Gim Jeongeun a exprimit lo besonh de reünificar Corèa e a avertit que la confrontacion mena solament a la guèrra.
 
Lo jove comandant suprèm de la Corèa del Nòrd, qu’arribèt al poder en decembre de 2011 après la mòrt de son paire, Gim Jeongil, a reclamat tanben de priorizar las questions economicas en 2013, mai que mai a respècte de l’agricultura e de l’indústria, segon d’informacions de l’agéncia sud-coreana Yeonhap (o Yonhap).
 
Lo messatge es arribat mens d’un mes après que la conservatritz Bak Geunhye (o Park Geun Hye) siá estada elegida presidenta de la Corèa del Sud.