La Generalitat de Catalonha ven de publicar un lexic basic de la Covid-19 en lenga dels signes catalana (LSC) per metre a la posita dels ciutadans, mai que mai dels signants, los principals tèrmes restacats amb la pandemia. S’agís d’una seguida de vidèos que completan un glossari precedent amb las expressions d’usatge pus freqüent a l’entorn de l’epidemia, de sa gestion e de sa prevencion.
 
La terminologia l’a mesa en òbra la Direccion Generala de la Politica Lingüistica, qu’es l’organisme que velha per las politicas lingüisticas de la Generalitat e qu’una de sas tòcas es precisament la de “promòure l’usatge, la difusion e la coneissença de la lenga occitana, denomenada aranés en Aran”.
 
Preséncia a la television
 
En mai d’aquò, aquel organisme a obtengut que la television publica de Catalonha rapòrte tanben en lenga dels signes catalana las informacions restacadas amb la pandemia, mai que mai las conferéncias del premsa dels representants de la Generalitat, amb una petita fenèstra a la part superiora esquèrra dels ecrans de television.
 
La lenga dels signes catalana
 
Las lengas dels signes son de lengas naturalas de las personas sordas que remplaçan lo lengatge oral per un canal visual e espacial. Coma las lengas oralas, las lengas dels signes son fòrça restacadas als territòris. Dins cada region, los signants an lor biais de parlar, pasmens, dins l’estat espanhòl son reconegudas doas lengas dels signes, l’espanhòla e la catalana.
 
La lenga dels signes catalana es emplegada per aperaquí 25 000 personas dont la mitat serián de personas sordas.