Caliá plan un tal nom, Operacion Apollo,  per aquela mission quasi extraterrèstra d’aquesta passa de relançar una competicion de rugbi de XIII. Operacion Apollo: tal es lo nom causit pels responsables australians pel relançament del campionat NRL e per tornar veire los apollons-jogaires de rugbi sus las pelenas.

Austràlia: cap sul 28 de mai
 
La NRL a cambiat de director general la setmana passada. D’acòrdis son estats trapats amb los difusaires TV, mas las pichonas frasas contunhan. Lo govèrn de Queensland es mai que esitant per la represa de la competicion: las tres formacions de la província e los neozelandeses poirián èsser obligats de demorar en Nòva Galas tant que riscarián la mesa en quarantena al retorn a l’ostal!
 
Lo format de la competicion es pas encara arrestat. Sembla que los Estats d’Origina se debanarián aprèp la finala del campionat.
 
 
Perpinhan e Tolosa: a l’entraïnament l’1 de mai
 
Perpinhan (Superliga) e Tolosa (Championship) espèran de poder reprene progressivament los entraïnaments collectius a comptar del 11 de mai. D’en primièr, per pichons grops abans de se tornar trapar en efectiu complet.
 
Coma lo calendièr serà sarrat en Superliga, amb de partidas de jogar (benlèu) cada 3 o 4 jorns, davant de tribunas voidas, caldrà probable faire apèl a mai de jogaires: una escasença pels jogaires occitans e catalans de la resèrva (Dragonets) de jogar al mai naut nivèl e, qui sap?, de se ganhar de plaças de titulari.
 
 
Elèit: que serà la sason 2020-21?
 
Dins una entrevista balhada al jornal L’Indépendant, lo president de la Federacion Marc Palanques precisa que los avises èran partejats dins los clubs d’Elèit (1 e 2) entre un arrèst definitiu e una represa possibla de la competicion, mas que l’anóncia de la perseguida del confinament pel president Macron e l’impossibilitat d’aver de public d’aicí al mitan de julh butèron inevitablament a la decision de sason blanca.
 
Ajusta que, las annadas passadas, lo primièr del classament foguèt pas lo campion e que, sol, Limós (qu’èra primièr al moment de l’arrèst) romega d’èsser pas estat designat campion.
 
L’entraïnaire dels Roge e Negre, Maxime Gressèque, plaideja per una represa de la competicion cap a la fin de setembre. Lo president Palanques anóncia un temps de concertacion entre la Federacion e los clubs per determinar lo format e lo calendièr de las competicions. Los clubs seràn menats a faire d’estalvis e aquò deuriá demesir la venguda dels jogaires estrangièrs. Vilafranca e Tolon serián candidats a una montada en Elèit 1, alara que Palau se trapa fàcia a bravas dificultats financièras per perseguir al mai naut nivèl. Responsas: d’aicí a la fin de junh.
 
Per ara, se sap que lo campionat d’Euròpa dels U19 previst en agost en Itàlia se transformarà en campionat dels U20 en setembre de 2021. La Copa d’Euròpa es remandada d’octòbre d’ongan a setembre de 2021 e servirà de preparacion a la Copa del Mond pels Pols.
 
 
 
 
Alan Roch