Ven tot just de paréisser a las edicions Tròba Vox, lo darrièr album de la cantadora e compositritz Muriel Batbie Castell: Par tous les chemins. S’agís efectivament d’una aventura per mai d’un camin, e per mai d’una lenga, que se concretizèt per aquela artista de tria. A l’origina, èra un libre del meteis nom: Par tous les chemins, Florilège poétique des langues de France (edicions Le Bord de l’Eau). Aquela antologia de la poesia contemporanèa en sièis lengas (alsacian, basco, breton, catalan, còrs, occitan) es pareguda en 2019, e los coordinators, Marie-Jeanne Verny e Norbert Paganelli, demandèron a Muriel Batbie Castell de ne crear un recital, en tota libertat de causida dels tèxtes per la mesa en musica. La presentacion de l’obratge e lo recital foguèron presentats primièr al CIRDÒC, e es aquí que comencèt l’aventura. Lo recital viatgèt en Occitània per festenals, en Corsega, al Bascoat. E un jorn, après un concèrt pel festenal Les Troubadours chantent l’art roman, lo director d’aqueste festenal, Gerard Zuchetto, foguèt estrambordat e prepausèt a la cantadora de ne far un album amb son ostal d’edicion Troba Vox. Aquí doncas lo trabalh, de descobrir d’urgéncia: 17 títols, 17 poetas cantats en sièis lengas (çò que demandèt a la cantadora un brave trabalh lingüistic tanben) amb d’univèrses cambiadisses, susprenents, e sempre d’una beltat embelinaira!
 
L’artista, amb la votz que li sabèm, rica e plena de sensibilitat, siá s’acompanha a la guitarra, siá canta a cappella, e per la màger part de las òbras, es aicí acompanhada d’una arpista, Anne-Claire Cazalet, que pòrta a l’obratge una beltat e un ambient oniric delicioces.
 
Es segur qu’un còp lo desconfinament arribat pels artistas, aquel recital sason 2 perseguirà un camin bèl! D’aquel temps, l’album se pòt crompar a cò de las edicions Tròba Vox (CD o descargament) sul sit web de l’editor.


 
 
 
Cheleg Bergmann 


 
 

---

BATBIE CASTELL, Muriel. Par tous les chemins (1 CD digipach amb libret). Tròba Vox edicions, 17 cançons.