Malgrat que lo Mond entièr patisca una crisi sanitària, las despensas militaras son encara las pus nautas e lor creissença s’arrèsta pas. L’institut internacional de recèrca sus la patz d’Estocòlme (SIPRI segon sa sigla en anglés) rapòrta qu’en 2019 i aguèt la pojada pus nauta del decenni, fins a dos miliards de dolars, en çò que los estats li dison “defensa”. Segon aquelas donadas, en 2019 las despensas militaras mondialas cresquèron de mai d’un 4% a respècte de l’an 2018 e sèm arribats al nivèl pus naut dempuèi la Guèrra Freja.
 
Los cinc païses que mai d’argent an destinat a lors armadas son los Estats Units, China, Índia, Russia e l’Arabia Saudita, qu’amassa representan lo 62% del total. De soslinhar que son los Estats Units e China —dos païses geopoliticament adversaris— qu’an aumentat mai lor budget, d’un 5,3% e d’un 5,1% respectivament. “Aquò sembla un retorn a la rivalitat entre las grandas poténcias”, çò ditz lo cercaire del SIPRI Pieter D. Wezeman.
 
A partir d’aquelas donadas, las diferentas organizacions umanitàrias dels diferents païses reclaman que s’arrèste aquela militarizacion e que se destine tot aquel argent a la santat e a la crisi.
 
 
Malèsser dins l’estat espanhòl
 
L’estat espanhòl es un dels païses qu’a mai militarizat la lucha contra la Covid-19, çò qu’a pas agradat als collectius pacifistas ni mai als personals sanitaris que planhon que desplegar l’armada per afrontar la pandemia es “un degalh de recorses innecessari”, ja que “per luchar contra un virus cal pas de gents armadas”. Dins aquel sens, las organizacions Centre Delàs e Fundipau an presentat de rapòrts fòrça critics, mai que mai dempuèi que l’executiu de Pedro Sánchez s’es engatjat a contunhar d’aumentar llo budget militar.