Dempuèi un brave brieu, los òmes e las femnas pensan que ieu, Planeta Tèrra, soi en manca granda de plastics de tota mena: botelhons, saconèls, bidonalhas,.... Soi en manca d’espandidas d’òli, de petròli, ... Quora vendrà lo jorn ont totes mos oceans, mas mars seràn de fons a cima petrolificats, plastificats?
 
Se dison que raja dins mos valats, mos rius, mos flumes una aiga clareta de tròp! Res non val per eles una aiga mòrta clafida de bordilhas, sens ges de vida. Jorn e nuèch, supòrtan pas totas aquelas menas de peisses que nadan contra subèrna.
 
Se pensan que totas mas forèsts, e mai aquela d’Amazonia, brutlan pas encara pro! Es que me demandaràn un jorn de far bofar d’auragans per empusar lo fuòc! De veire flambar mos arbres centenaris, ne soi tota escaufada! Tota enfuocada, tota belugejanta esclairi la luna e lo solelh!
 
Aqueles aucèls, aucelons coma aucelasses, que piafan jorn e nuèch dins cadun de mos cantons, lor botan la tèsta coma una semal. Vòlon n’acabar al pus lèu amb aqueles aucèls encantaires! E aquelas bèstias, grandassas coma pichonetas, que se passejan jorn e nuèch, lor destimborla lo cap. Vòlon me far clavar la maissa.
 
Totas aqueles umans an dins l’idèa qu’aquelas sasons pesan. Podètz pas saber l’energia que despensan per far fondre mon Artic e mon Antartic l’ivèrn, per me desenflorir a la prima, per escaufar mos oceans l’estiu, e me desplomar l’auton!
 
Vòlon de mai en mai d’òmes e de femnas sens los pès sus tèrra! Lor cal encara de miliards d’umans atropelats fòrasòl. Esquichats coma de sardas, cadun embarrat dins son trapon, viraràn virtual! Entre virtuals, s’inventaràn benlèu una planeta novèla. Virtuala aicesta! D’aquel temps, ieu, alenarai melhor?
 
Femnas e òmes luchan de longa per m’entrebolar l’aire. Jorn e nuèch fan virolejar, a mon entorn, de milions d’avions. De longa, las usinas lançan de nivolassas d’escopidas negrassas de mai en mai emporcassidas. Cada annada, me fan suportar encara mai de veituras salopejairas! Sens pausa, de pesticidis de tota mena venon empudesinar mon environa!
 
Planetianas e planetians, ne’n pòdi pas pus! N’ai un confle de vos! Me soi espolsada! Del còp, ai liberat mon corona. Benlèu terrians, embarrats que sètz , aquò vos farà perpensar? Qual sap?
 
 
 
Clamenç
Umorista occitan
 

 
 

---

Partejatz lo confinament amb la rèsta de legeires

Encoratjam nòstres legeires a nos mandar de tèxtes, de vidèos, d’imatges o d’àudios sus lors idèas de passar lo confinament. De partejar aqueles moments entre totes nos ajudarà a nos donar d’idèas los unes als autres, e nos coneisserem un pauc melhor.
        
    

fffff		fffff
	Cronicas de l'embarrament A l’iniciativa de sos legeires, Jornalet prepausa de mandar regularament la cronica d’un embarrament. Aquela cronica pòt èsser ficcionala o a mièjas reala, mas es una convidacion a un exercici literari. Daissatz  vòstra imaginacion s’exprimir en una lenga trabalhada, rafinada, afogada. I podètz apondre un imatge. Los tèxtes seràn publicats regularament dins la seccion “Cronicas de l’embarrament”. Escrivètz a info@jornalet...

 
        
    

fffff		fffff		fffff
	Lo confinament dels legeires de Jornalet
			Sès confinat a l’ostal? As, totun, de connexion a Internet? As de bonas idèas per passar lo temps? Jornalet demanda a sos legeires que partegen lors idèas e lor vida en confinament amb un messatge de tèxt, una fòto, un vidèo, un àudio o qué que siá que se pòsca publicar en linha e partejar amb los autres legeires.                                                   As bastit un castèl de carton pels enfants? Fas d’escalada dins la cosina? As organizat un concèrt per videoconferéncia? Tenes una vida sociala sus las fenèstras o los balcons? Fas d’espòrt a l’ostal? As de bons libres a nos recomandar? De bonas idèas per èsser tostemps de bona umor?
	Manda tos documents a info@jornale...                                                   Convivéncia e paratge en confinament.