Especiau Pau. La revista Reclams, publicada per l’Escòla Gaston Fèbus (EGF) dempuish 1897, es gavidada susquetot per lo son president Maurici Romieu, lo cap-redactor Sèrgi Javaloyès e la secretària de l’EGF, Dauna Anna-Pèire Darrées. Recentament sortit, en abriu sonque, lo son darrèr numerò (n° 853, darrèr trimestre de 2019) es consacrat a Pau, capdulh de Bearn - e deus Pirenèus-Atlantics... – on compta evidentament la plaça de la lenga nòsta. Lo gascon de Bearn, a maugrat de las aparéncias, es ua realitat. Qu’es bien coneishut que los bearnés parlan tres lengas: lo bearnés, lo francés …e d’aubuns qu’ajustan, “lo sosentenut”. Mes que’m horavii e que son sonque aqueras maishantas lengas d’au delà deu Lui de Bearn qui prosejan atau! Egau, aquera navèra liurason de la venerabla revista es hòrt interessant. En mei de 120 paginas, que barreja cronicas ancianas (hèstas felibrencas de Pau en 1901 vistas per Jan-Victòr Lalana, un deus fondadors de l’EGF), entervistas de personalitats (l’escrivan Eric Gonzales, autor de romans e lingüista), cantas (la plan coneishuda Bèth cèu de Pau, bien entenut, o cançons de Nadau o rap), poèmas (“Sorrom-Borrom” o “Le rêve du Gave”: cant VII suu gran arriu pirenenc au pè deu Baloard deus Pirenèus), originau evocacion deu manescau d’Empèri Bernadòta (Jean-Baptiste Bernadotte, vadut a Pau en 1763 e rei de Suècia de 1818 a 1844 dab lo nom de Karl XIV Johan) per Maurici Romieu qui’u descobrí en Suècia quan ensenhava lo francés a Őrebro, entre Estocòlme e Oslo), iniciativas contemporanèas (la planeta Internet e Pau), mascaradas paulinas (lo Carnaval) e autas pepitas literàrias. Dirèi qu’aqueth “Especiau Vila de Pau” sembla un chic a libes o numèros de la revista Autrement dab ua tematica precisa (grana ciutat, question sociau, petit atlas...). N’es pas completament ua innovacion, mes que confirma lo prètzhèit de qualitat e d’obertura de la revista occitana de Bearn vaduda au còr de Gasconha. Rensenhaments: reclamsedicions@gmai... o +33(0)6 87 80 28 60.
 
 
 
Joan Jacmes Fénié