Superliga: encara lo temps de las ipotèsis
 
Per çò qu’es del Championship e de la Superliga, sèm encara dins lo fosc quant a la represa e al format de las competicions. Las partidas poirián reprene en julh. De rescontres se poirián téner lo meteis jorn sul meteis estadi per demesir los còstes d’organizacion.
 
L’interdiccion de practicar los espòrts professionals d’aicí al 1r de setembre en França buta los Dragons e lo Tolosa Olimpic siá a demandar una plan ipotetica derogacion, siá a considerar de demorar e de jogar pendent dos meses en Anglatèrra. Serà pas cap a Santa Elena coma lo Napoleon, mas cap a Saint Helens!
 
Lo president Guasch espèra d’aver l’autorizacion de daissar dintrar 5000 espectators (los abonats) als rescontres quand los Sang e Aur tornaràn (enfin…) a Brutus.
 
Diluns que ven, 11 de mai, los jogaires de Perpinhan e de Tolosa reprendràn los entraïnaments d’en primièr sens contacte e en tenguent compte de la distanciacion sociala. Va pas èsser simple!
 
Lo poder anglés autreja als 13 una ajuda de 16 milions de liuras (18 milions d’èuros) que permetràn la represa de las competicions e la preparacion de las Copas del Mond de 2021.
 
Dins la setmana, de Dragons anèron balhar un còp de man als benevòls dels Rèstos del Còr.
 
 
NRL: l’orizont s’esclarzís
 
Per l’NRL, la data es fixada: represa de las partidas: lo 28 de mai. Los clubs de Queensland an obtenguda l’autorizacion de s’entraïnar en cò sieu e de se desplaçar en Nòva Galas del Sud per jogar. Sols, los neozelandeses seràn obligats de s’installar en Austràlia lo temps de la competicion.
 
Aquesta setmana, la Tempèsta de Melbourne se pòt pas entraïnar dins son estat de Victòria: alara, se desplaçarà a las raras de son encontrada.
 
Dins lo rambalh d’escambis entre poder esportiu, govèrns e mèdias, de jogaires an agut la marrida idèa de téner pas compte de las restriccions impausadas pel confinament: dos van faire de camping, un autre dança amb d’amigas reçaupudas a son ostal… La NRL pren de sanccions leugièras e l’opinion o compren pas. L’entraïnaire de Melbourne, mai radical, pensa d’interdire l’usatge dels rets socials a sos jogaires.
 
 
Un libre sus Limós XIII
 
Fauta de poder prene lo camin de l’estadi, òm se pòt noirir intellectualament amb un pauc de lectura esportiva. Atal, l’Amicala dels Ancians de Limós publica lo segond tòme del Libre d’Aur del club que pòrta sus las annadas 1993-2020. Sortida prevista l’11 de mai. Costaràn 15 o 20 èuros se lo volètz reçaupre a l’ostal.
 
 
 
 
Alan Roch