Un robòt de quatre pautas sonat Spot es a patrolhar coma un can un pargue de Singapor per contrarotlar que los ciutadans complisson las nòrmas de separacion fisica e qu’empachan aital d’infeccions pel coronavirus. Per mejan de sos nautparladors, lo robòt avisa los ciutadans del besonh de manténer la distància de seguretat e analisa lo comportament dels passejaires amb sas camèras. Segon lo govèrn de la ciutat-estat, fa pas de reconeissença individuala ni amassa de donadas personalas.
 
Ara per ara, Spot es en fasa de tèst e es acompanhat d’un uman que ne susvelha lo movement. Quand las espròvas seràn satisfasentas, d’autres robòts similars patrolharàn los autres pargues de Singapor. A mai, es previst qu’una trentena de drònes susvelhen quantas gents percorron los pargues.
 
Spot es desvolopat per la societat estatsunidenca Boston Dynamics, es contrarotlat a distància, de sòrta que se redutz lo risc d’infeccion dels gardians del pargue que farián la meteissa foncion. Las pautas permeton que lo robòt marche sus quina superfícia que siá, çò que las ròdas li permetrián pas.