Lo Conselh Constitucional francés a emés una senténcia sus l’estat d’emergéncia sanitària decretada pel govèrn. L’organ constitucional suprèm de l’Estat a validat la màger part del tèxt de la lei votada dissabte passat al parlament mas n’a emendat doas condicions. D’un caire, limita lo nombre de personas que pòdon aver accès a las donadas d’una persona malauta e exigís que se garentisca lo respècte del drech de confidencialitat. D’autre caire, reclama qu’un jutge susvelhe las condicions del confinament d’una persona s’aquela pòt pas sortir almens sus un orari jornadièr de dotze oras. Los gardians de la Constitucion francesa considèran d’efièch que la quarantena es una mesura de privacion de libertat que pòt pas èsser decretada sens vigilància judiciària.
 
Lo jutjament sus l’adeqüacion d’aquela lei a la Constitucion èra estat sollicitat pel president francés, Emmanuel Macron; lo del Senat, Gérard Larcher; e qualques parlamentaris.
 
Lo Conselh Constitucional soslinha que l’isolament complet dels cases suspèctes e dels malauts de coronavirus, qu’enebís quina sortida que siá o qu’obliga las gents de demorar dins lor domicili mai de dotze oras cada jorn, es una mesura privativa de libertat que pòt pas èsser dictada pel govèrn o pel parlament mas pel poder judiciari.
 
Quant a l’isolament, segon lo Conselh Constitucional, lo cal decretar après un certificat medical e se pòt perlongar delà catòrze jorns s’o decidisson tanben los mètges mas es indispensable qu’o autorize un jutge.
 
Per çò qu’es del tractament de las donadas dels malauts de la Covid-19 e del mond qu’an agut contacte amb eles, se soslinha qu’aquela informacion se deu limitar a lor situacion serologica o virologica.