Los ministres dels afars estrangièrs de França, d’Egipte, de Chipre, de Grècia e dels Emirats Arabis Units, tenguèron l’11 de mai passat una reünion per videoconferéncia per discutir de la situacion de Libia, çò rapòrta Tamazgha.fr.
 
Mentretant, las accions crimilanas de la dicha Armada Nacionala Libiana (ANL) del marescal Khalifa Haftar se multiplican e diferentas institucions internacionalas començan de rompre lo silenci e denonciar una actitud inumana, en menaçant de menar Khalifa Haftar davant la Cort Penala Internacionala. Totun, Haftar seriá sostengut per França, segon Tamazgha.fr.
 
Dins aquel sens, lo secretari general de l’ÒNU, António Guterres, demanèt dimars passat “la fin immediata de totas las operacions militaras” en Libia fàcia a la creissença dels combats a causa de l’ofensiva de l’ANL contra Trípol, ont se tròba lo sèti del govèrn dich d’unitat.
 
Lo pòrtavotz de Guterres, Stéphane Dujarric, reconeguèt que “i a pas de solucion militara al conflicte en Libia”, del temps que soslinhèt de metre fin als combats per “calmar la situacion e evitar un conflicte de granda escala”.
 
Guterres condemnèt totas las agressions contra la populacion civila après aprene la mòrt de près d’una desena de personas pendent la setmana passada a causa de las atacas de l’ANL.
 
Haftar a refusat de cessar lo fuòc durant lo Ramadan. De son costat, lo govèrn de Libia, que ten lo sosten de l’ÒNU, a pas volgut manténer de convèrsas de patz amb Haftar.
 
 
Exterminar los berbèrs
 
Mentretant, lo sheikh madkhalista Ahmed Buduira, alias “Abu Aisa Al Marjaui”, pròche del marescal Haftar, menacèt l’an passat d’exterminar los berbèrs libians. Segon el, “la liberacion” de la zòna oèst del país, qu’escapa al contraròtle d’Haftar, deu començar per la somission dels berbèrs ibaditas qu’el considèra “mescresents”, e que, per tant, per el es legitim d’exterminar.
 
Aquelas menaças an constrench los berbèrs libians de jónher lo front del GUN per defendre Trípol.
 
 
Los madkhalistas
 
Los madkhalistas seguisson un corrent salafista menat pel sheikh saudian Rabi Al Madkhali que presica “l’obesissença absoluda al governant”, quin que siá, e que ditz que la democracia es la substitucion de la sobeiranetat de Dieu per la sobeiranetat del pòble. Son, totun, ostils als movements de l’islam politic e quitament als grops jihadistas, e mai ideologicament ne sián fòrça pròches. La milícia d’Al Marjaui es aliada al marescal Haftar, sostengut per Egipte, pels Emirats Arabis Units e, mai discretament, per l’Arabia Saudita. En 2016, Rabi Al Madkhali emetèt un avís religiós qu’encoratjava sos partisans a jónher los rengs del marescal Khalifa Haftar.
 
Amnestia Internacionala a denonciat la milícia d’Al Marjaui en revelant qu’aviá cremat de libres e raubat d’estudiants membres d’una associacion universitària qu’avián organizat una jornada de la tèrra sus lor campus a Benghazi. En novembre de 2017, la milícia barrèt un festenal de benda dessenhada a Trípol e acusèt los organizaires d’esplechar “la feblesa de la fe e lo pivelatge per las culturas estrangièras”.
 
 
L’ÒNU exigís de l’ANL que cèsse l’activitat militara
 
Lo Conselh de Seguretat de las Nacions Unidas demandèt ja l’an passat a l’Armada Nacionala Libiana (ANL) del marescal Khalifa Haftar de quitar tota sòrta d’activitat militara, en avertissent que menaça l’estabilitat del país.
 
Lo Conselh “demanda a las fòrças de l’ANL de frenar tota activitat militara”, çò a precisat l’ambaissador d’Alemanha davant las Nacions Unidas, Christoph Heusgen.
 
D’autre caire, los ministres dels afars exteriors dels païses del G7 an assegurat que s’opausan energicament a l’activitat militara dins lo país e an avertit implicitament Haftar per son avançada devèrs Trípol.