La Cort Europèa dels Dreches Umans a condemnat l’estat francés per las percaças e lo desmantelament de camps de ròms quand Manuel Valls èra ministre de l’Interior. Segon la senténcia de la cort, l’estat francés manquèt a l’article 8 de la Convencion Europèa dels Dreches Umans, que garentís a cada persona lo respècte de “sa vida privada e familiala, de son domicli e de sa correspondéncia”. L’estat francés es estat condemnat a pagar 7000 èuros a cadun dels demandors, en mai de 7920 èuros de repartir entre totes coma despensas judiciàrias. Aurà tanben de pagar las taxas implicadas per la procedura.
 
 
La percaça dels ròms
 
Quand Manuel Valls èra ministre de l’Interior (2012-2014) menèt una percaça de ròms dins l’estat francés. Defendèt que pauques d’eles podián demorar en França e que ne caliá expulsar la majoritat. Sas proposicions foguèron fòrça criticadas pels activistas dels dreches umans, per la Comission Europèa e quitament per qualques ministres del govèrn francés d’alavetz.
 
 
De ciutadans de l’UE
 
Los demandors son sèt ciutadans d’origina romanesa dont sièis demoravan dins l’estat francés dempuèi fòrça ans, e mai aguèsson un permés de residéncia per dètz anscoma ciutadans de l’Union Europèa. Al moment dels faches, totes los enfants èran escolarizats.
 
 
De recorses rebutats
 
Lo primièr d’octòbre de 2012, après lo desmantelament d’un autre camp, un grop de 141 personas que compreniá una cinquantena d’enfants se gandiguèron en caravanas a La Courneuve, una comuna de la banlèga de París. En març seguent, lo cònsol màger de la vila ordenèt l’evacuacion del camp, e per aquela rason plusors ciutadans expulsats presentèron de nombroses recorses, que foguèron refusats. Enfin deguèron abandonar lo sit sens aver cap d’espaci ont viure; fòrça d’eles se trobèron forçats de dormir per carrièras o dins las veituras abans de transportar lo campament a Bobigny, ont lor calguèt partejar de caravanas d’autras familhas o ne crompar de nòvas.
 
 
Pas de tractaments inumans
 
La cort dels dreches umans, ça que la, a refusat de condemnar l’estat francés per aver mancat a l’article 3 —qu’enebís los tractaments inumans—, perque los ciutadans abandonèron lo camp per lor pròpri compte e que la polícia i intervenguèt pas. A mai, los jutges considèran que las autoritats francesas son pas estadas indiferentas a las condicions de vida que las rescontrèron los ciutadans deslotjats.
 
 
Un ministre de l’Interior polemic
 
Dins la memòria collectiva, lo mandat de Valls coma ministre de l’Interior foguèt marcat per sas politicas repressivas coma las expulsions dels ròms o la polemica deportacion vèrs l’estat espanhòl de la militanta basca Aurore Martin.
 
A Pau, en març de 2014, la polícia reprimiguèt amb duretat una manifestacion contra las politicas de Valls. L’estiu de 2013, a Orlhac, lo ministre de l’Interior d’alavetz foguèt fiulat e tractat de faissista per carrièras.

 

El Tribunal Europeu de Drets Humans condemna França per l’expulsió de romanesos d’ètnia gitana promoguda per @manuelvalls quan era ministre d’Interior.

Dimitirà o ens seguirà donant lliçonetes a l’Ajuntament de Barcelona? pic.twitter.com/Ba93nyEWz0

— Josep Costa< (@josepcosta) May 15, 2020