La television australiana ABC a emés d’images “exclusius” que mòstran la destruccion d’un vilatge en Papoa Occidentala. Segon lo reportatge, los faches son consequéncia d’un bombardament indonesian amb d’elicoptèrs, après qu’una guerrilha independentista faguèt almens 16 mòrts dins un atac en 2018. Un testimòni acusa l’armada “d’aver assassinat, arrestat e torturat” de papós pendent l’operacion.
 
Es pas abitual que los mèdias obtengan de vidèos restacats al conflicte de la Papoa Occidentala, mai que mai en çò que tanh a las operacions militaras. Los images, emeses pel programa Foreign Correspondent, mòstran, segon los reportèrs, las consequéncias d’una operacion indonesiana suls vilatges de las tèrras nautas de Papoa. S’i vei lo planh dels abitants, la destruccion d’ostals e qualques personas nafradas. Lo document afirma que de centenats de personas se refugièron dins lo bòsc e que qualques unas ne tornèron solament per poder enterrar los mòrts.
 
Lo reportatge soslinha las denóncias qu’en aquel atac se seriá emplegat d’armas quimicas, e tanben rapòrta qu’Indonesia refusa categoricament aquela acusacion. L’emission mençona tanben d’organizacions pròdreches umans segon las qualas l’operacion auriá provocat la mòrt de mai de 200 personas.
 
Los imatges se pòdon veire entre las minutas 19:15 e 20:00 del reportatge:
 

 
L’operacion militara se seriá tenguda après qu’una faccion del movement armat independentista papó TPNPB tuèt, en decembre de 2018, almens 16 trabalhadors que bastissián l’estrada Trans-Papoa, que travèrsa la Papoa Occidentala de ponent a levant. Lo movement independentista considèra que la sola motivacion d’Indonesia per la bastir es l’extraccion de las ressorsas naturalas. Lo govèrn indonesian assegura que l’infrastructura beneficiarà a totes los residents de la Papoa Occidentala.
 
 
Mai de militarizacion en aprofechant lo coronavirus
 
E gaireben al meteis moment que l’emission dels imatges, Benny Wenda, cap del Movement Unit de Liberacion de la Papoa Occidentala (ULMWP), a denonciat qu’Indonesia aprofiècha la crisi del coronavirus per “militarizar mai encara” lo territòri. Wenda acusa las autoritats indonesianas d’aver refusat de noirir pendent una setmana entièra plusors activistas papós encarcerats, dont Bazoka Logo, president del burèu politic de l’ULMWP.
 

 

---

Aquèsta nòva es adaptada de Nationalia amb qui Jornalet ten un acòrdi de cooperacion

 
 
 
 

fffff		fffff
	Ocupada per Indonesia despuèi 1963   Las organizacions independentistas de Papoa Occidentala —tant las associacions pacificas coma los grops armats— patisson despuèi de decennis la persecucion politica, militara, judiciària e policièra de l’estat indonesian.   Anciana colònia neerlandesa, la Papoa Occidentala foguèt envasida per Indonesia en 1963 e annexada formalament en 1969, après un referendum ont sonque se permetèt la participacion d’un milièr de personas. Los independentistas argumentan que la Papoa Occidentala foguèt pas jamai descolonizada formalament e que, per tant, caldriá organizar un referendum d’autodeterminacion sul territòri.