“Austràlia sens lo rugbi de XIII es pas Austràlia”, es la frasa prononciada pel president de la federacion australiana al moment de l’arrèst de las competicions aprèp 2 jornadas en març. Se lo campionat NRL repren lèu, la situacion demòra plan fosca en Euròpa.

Coma de cavals fòls…
 
Pel grand plaser dels afogats de palma ovala, es doncas lo dijòus 28 de mai que lo campionat NRL tornarà prene, totjorn dins d’estadis de pòrtas barradas e amb una durada redusida de la competicion. En Nòva Galas del Sud, sols tres terrens reçaupràn las partidas. La formacion neozelandesa a mudat en Austràlia tant que duraràn las mesuras de quarantena.
 
Qualques règlas son cambiadas: un sol arbitre de camp (mas los arbitres protèstan) e una atencion portada sus l’execucion dels tenguts per que sián nets: sens fren dels defensors o simulacions dels atacants.
 
Al programa de la primièra jornada de represa, que serà la tresena de la sason, aurem:
   
E nos poirem installar amb delectacion dins nòstre cadieral, per gaitar, una cantina de cervesa a portada (bon, pensi que las liurasons de cervesa australianas son suspendudas, alara beurem una Ciutat o una Mandra), una partida cada matin del dijòus al dimenge que, cada jorn, BeInSport retransmetrà un rescontre!
 
 
Superliga: de qué ongan serà fait?
 
En Euròpa, lo president del Dragons, lo Bernat Guasch, se ditz las d’avançar un jorn d’un pas en ligason amb los autres clubs, los responsables de la Superliga e de la Rugbiliga per recular, l’endeman, de dos passes.
 
Se parla de julh o d’agost per una represa. De mai, pels catalans e pels canadencs (Toronto), se pausa la question de la quarantena: poiràn circular liurament cap Anglatèrra o s’i deuràn installar per jogar? Lo fulheton ven bravament fastigós, que lo primièr ministre càmbia d’idèa d’un jorn l’autre sus la circulacion entre Anglatèrra e Euròpa.
 
Per Tolosa, la tendéncia es clarament a l’arrèst de la competicion del Championship per ongan.
 
 
Elèit 1: quora la represa?
 
Es tanben de la question de la represa que parlan los clubs d’elèit (1 e 2) e la Federacion, amb de posicions divergentas. Del costat de Limós, se plaideja per una represa al mai lèu: tre setembre. Alara, sonque per de rasons mai que mai economicas, un dels presidents de Carcassona prepausa d’esperar la mitat de novembre. Demòra d’esperar que i aja un consens e un vam collectiu per relançar los campionats. Acabarem aquesta cronica sus una bona novèla: Palau ven de confirmar que s’engatjava plan dins lo campionat d’Elèit 1 per la sason venenta e que levava atal los dobtes sul possible retirament un temps evocat.
 
 
 
 
Alan Roch