Los Païses Basses, Àustria, Suècia e Danemarc an mostrat lor oposicion al plan prepausat per Emmanuel Macron e Angela Merkel pel fons de recuperacion economica e an presentat una proposicion alternativa. Los quatre païses son en favor d’un fons d’emergéncia temporari constituit d’ajudas jos forma de crèdits. “Podèm pas èsser d’acòrdi amb quin instrument o mesura que siá que mene  a una mutualizacion del deute ni a un aument significatiu del budget de l’Union Europèa”, çò asseguran dins un document. Dins aquel sens, defendon un plan de “crèdits per crèdits”. Soslinhan qu’aquel instrument extraordinari se pòt solament emplegar un còp, amb una data d’expiracion al cap de dos ans.
 
A mai, creson que las ajudas se devon destinar a las activitats que contribuiscan mai a la recuperacion, coma la recèrca e l’innovacion, lo refortiment del sector sanitari e la transicion verda.
 
Lo plan anonciat per Macron e Merkel es un fons de transferiments e de subvencions, non pas de prèstes, per afrontar la crisi de la Covid-19 per una valor de 500 miliards d’èuros. Prepausan que l’argent se mande als estats. La proposicion francoalemanda desira que la Comission Europèa emeta de deute en representacion de l’Union Europèa e que l’argent se transferisca als estats a travèrs del budget europèu pluriannadièr. De lor costat, los Païses Basses, Àustria, Suècia e Danemarc escometon pels crèdits.