En Austràlia, la competicion NRL repren aqueste dijòus, mas fòrça questions se pausan encara. En Euròpa e al país, tot es plan luènh d’èsser reglat per que los jogaires tornen trapar las pelenas e lo public lo camin dels estadis.
 

NRL: un òme sol al mitan
 
La novèla de las bonas es doncas la represa aqueste dijòus 28 de mai, pel compte de la 3a jornada del campionat NRL arrestat al mitan del mes de març. L’encara mai bona es qu’anam poder seguir una partida cada jorn del dijòus al dimenge mercé a las retransmissions de BeIN Sport.
 
La decision de tornar a un sol arbitre de camp (en plaça de 2) es estada de mal engolir pel sindicat dels arbitres. La federacion remetiá pas en causa la paga dels 22 arbitres pertocats. Fin finala, federacion e arbitres an decidit de faire un bilanç en fin de sason. Un sondatge se metrà en plaça al prèp dels espectators per aver lo vejaire dels afogats abans de prene la decision definitiva.
 
Las partidas dels Estats d’Origina se jogaràn aprèp la finala del campionat. Aquò fa plaser als entraïnaires qu’auràn atal los jogaires a disposicion per tres setmanas en plaça de los veire tornar partir dins lors clubs quand la competicion se ten a la mièja sason.
 
 
Superliga: objectiu agost
 
La tendéncia de l’ora seriá d’anar cap al retorn de la Superliga cap al 15 d’agost. Los Dragons reprendrián a la debuta d’agost per jogar las doas partidas en retard. La finala se poiriá debanar en novembre o decembre; una ipotèsi considèra la finala per genièr de 2021!
 
Los Lops de Warrington an de bons caissals: es pas una feda qu’an agantat, mas un… lapinon. L’australian Greg Inglis, un monument del mond oval, qu’aviá arrestat sa carrièra esportiva en abril de 2019 a ja signat per la sason 2021 dins lo club anglés.
 
Dins un comunicat, lo Tolosa Olimpic senhala que cap de decision es pas, ara per ara, presa per l’arrèst o la perseguida del Championship.
 
 
Elèit: serà fèsta per Totsants?
 
Pel campionat d’elèit, federacion e clubs se son parlats per videoconferéncia. La tendéncia es a una represa de la competicion per una Dimenjada Magica a la debuta de novembre. Mas lo calendièr es tributari de las decisions estatalas per se poder entraïnar e jogar de partidas d’espòrts de contacte.
 
Dins Aude, Maxime Gressèque a confirmat qu’entraïnariá Limós la sason venenta; l’entraïnaire del XIII de França, Aurelién Cologni, torna prene en man lo FC Lesinhan; a Carcassona, Patric Albérola abandona lo pòst e Frederic Camèl demòra en plaça, ajudat per Florenç Tòst e Teddy Sadaoui.
 
 
 
 
Alan Roch



 

 

---

Lo XIII en temps de covid-19, France 3 ne parla en occitan amb Lucas Albert dels Dragons Catalans