Brusselas prevei de refortir la cooperacion amb Africa e los Balcans per produire los medicaments mai près e ne garentir lo provesiment. La covid-19 a desvelat la dependéncia de l’indústria farmaceutica europèa envèrs China e Índia. Per mièg març, la Comission Europèa comencèt d’estudiar una nòva estrategia farmaceutica per resòlver las vulnerabilitats d’aquel sector que la pandemia a desveladas.
 
Per ara es a analisar los ponches flacs e ne dessenha lo plan. “Seriá pas mai rasonable d’aver desenant mai d’activitats dins lo nòrd d’Africa que non pas en Asia?”, çò demandava fa gaire lo cap de la diplomacia europèa, Josep Borrell.
 
De son latz, l’expèrta de la santat mondiala de l’European Policy Centre, Lieve Fransen, a conselhat la Nauta Representanta de l’UE en aquela matèria e li a recomandat que s’impulse l’indústria farmaceutica al continent african. “L’establiment d’una infrastructura farmaceutica locala eficaça en Africa ven rapidament una opcion estrategica e son aliança amb Euròpa portariá de grands beneficis per las doas economias”, çò ditz lo rapòrt liurat a Borrell, segon çò que rapòrta Vilaweb en mençonant l’ACN.
 
 
Produccion desmantelada
 
Fòrça temps abans la crisi del coronavirus, a Brusselas coneissián l’escassetat de medicaments dins l’UE. Mas a calgut que la crisi de la covid-19 fòrce la situacion per que la CE agisca.
 
Lo director de l’Agéncia Europèa del Medicament avertiguèt la setmana passada que la produccion farmaceutica en Euròpa l’avián desmantelada dins lo darrièr decenni. E mai l’UE siá l’exportator farmaceutic pus grand del Mond, amb mai d’un centenat de societats primadièras, depend de las matèrias primièras produchas en China e en Índia. Per exemple, lo 90% dels ingredients per far de medicaments generics coma lo paracetamòl provenon d’aqueles dos païses asiatics.
 
Fransen atribuís aquela dependéncia al fach que las societats farmaceuticas an externalizat una part de lor produccion per far d’economias. “La mondializacion a rendut mai aisit d’importar dels païses paures”, çò a dich.
 
De son caire, lo director de comunicacion de la Federacion Europèa de las Indústrias e Associacions Farmaceuticas, Andy Powrie-Smith, assegura qu’en mai de desmantelar la manufactura, tanben la recèrca scientifica l’an transportada als Estats Units e en China.
 
 
Nòva estrategia
 
L’executiu europèu vòl ara diversificar los fornidors per reduire las dependéncias exterioras e vòl restacar aquela nòva estrategia al budget pluriannadièr de l’UE, coma o avancèt una de sas vicepresidentas en abril. Es previst qu’aquesta setmana la CE presente los comptes e lo plan de recuperacion de la covid-19.
 
Fransen es contenta que l’UE, fin finala, aja remarcat aquel problèma e considèra important que la nòva estrategia prepause sustot la creacion d’estòcs d’emergéncia a l’escala europèa. Tanben l’indústria farmaceutica sembla de plan aculhir lo melhorament de l’autosufiséncia europèa. “En Euròpa nos cal aver un sistèma dobèrt mas estrategicament autonòm que pòsca plan foncionar amb mai de regions del Mond’, çò defend l’EPFIA.
 
Powrie-Smith ramenta que cal tanben refortir “l’ecosistèma de recèrca farmaceutica” en Euròpa amb un “sistèma de regulacion flexible” e mai d’encoratjaments per que los investidors vòlgan metre d’argent dins lo complèxe procès de desvolopar de tractaments o de vaccins. “Caldriá un procès regulador mai dinamic basat sus un dialòg constant entre los innovators e los regulators”, çò ditz. Considèra qu’aquò seriá mai que mai important per facilitar los ensages clinics de tractaments o de vaccins.
 
 
Agach devèrs Africa
 
Coma los centres de produccion asiatics son tròp luènh, Euròpa ne cèrca ara mai près. Borrell disiá fa pas gaire dins un article que seriá una “bona idèa” d’estudiar de nòvas alianças estrategicas amb Africa a respècte de la produccion dels medicaments. “Es probable qu’anem devèrs de cadenas de provesiment pus cort”, çò escriviá, en remarcant que lo barrament de las frontièras pel coronavirus aviá pausat de dificultats a l’importacion dels produches essencials.
 
A mai, avertissiá dels perilhs de dependre de païses coma China. “Nos interèssa politicament de dependre pas tròp de las poténcias estrangièras que pòscan, de qualque biais, implicar un naut còst per nòstra dependéncia”, çò avisava.