Aperaquí 500 personas manifestèron dimars passat davant l’espital Pellegrin de Bordèu dins l’encastre d’una jornada de cauma convocada per divèrses sindicats. Foguèt lo primièr recampament bordalés lançat pels agents espitalièrs en cauma e jonch per d’autres sectors. Exigisson un espital a la nautor dels besonhs e protèstan contra la “logica neoliberala criminala deu govèrn”.
 
La cauma e la protèsta contunhan uèi, aqueste còp al giratòri de l’espital Haut Lavesque a Peçac, de 12h a 15h.
 
 
Mobilizacion a l’escala de tot l’estat
 
Los mètges e lo personal espitalièr de tot l’estat francés son a se mobilizar e a Bordèu son prèstes,  ara que lo temps de confinament s’acaba e que se contèsta lo mal produch per las politicas ultraliberalas amb d’economias sul sistèma de santat. “D’efièch, la catastròfa sanitària a la quala sèm estats expausats es ben una question politica”, çò rapòrta Revolution Permanente.
 
 
Pas de medalhas mas d’argent
 
En mai d’aquò, las anóncias del govèrn francés suls espitals an sonque amplificat la colèra. Vòlon pas èsser tractats coma d’eròis nacionals ni èsser decorats amb de medalhas. “Fau pas mas crompas amb de medalhas”, çò dison los mètges e los infirmièrs. Sembla que, malgrat que tot lo mond espitalèr se siá mobilizat e reorganizat per afrontar la crisi sanitària, las primas seràn pas per tot lo mond mas solament per d’unes, çò que totes refusan a l’unanimitat: “Una granda solidaritat s’es desvolopada dins los servicis fàcia a la covid-19 e encara dins la cauma”.