capçalera campanha

Actualitats

InternacionalPoliticaSocietat

Minneapòlis: de fòrtas susmautas après un crime racista policièr

La mòrt de George Floyd, un òme negre que foguèt detengut e tuat per un policièr, a provocat de manifestacions violentas. An declarat l’estat d’urgéncia

| Carlos Barria / Reuters
La mòrt de George Floyd, un òme negre qu’èra estat detengut a Minneapòlis (Estats Units) abans d’èsser tuat per un policièr, a provocat de susmautas dempuèi tres jorns per tot l’estat de Minessòta; aqueste a declarat l’estat d’urgéncia. Dins un enregistrament vidèo se pòt veire un policièr blanc qu’escana Floyd amb son genolh pendent divèrsas minutas del temps que Floyd crida socors e ditz que pòt pas respirar. Mentretant, los autres agents o agachan amb passivitat. Per ara an licenciat quatre policièrs, e lo president Donald Trump a dich que l’FBI metriá en examen lo crime.
 
Las protèstas, convocadas a l’endrech exacte ont moriguèt Floyd, comencèron d’una manièra pacifica mas las tensions aumentèron de mai en mai en descadenant d’afrontaments entre los manifestants e la polícia. Se rapòrta lo cremament de barricadas, de sacatges de botigas e quitament l’incendi d’un comissariat de polícia. La polícia de la vila a raportat que tot son personal es estat evacuat “per interès per sa seguretat”, çò rapòrta CNN. A mai, NBC News ditz qu’un manifestant seriá mòrt jos las balas d’un policièr.
 
Trump a publicat un messatge sus Twitter ont menaça de fusilhar los manifestants. Lo ret social a considerat qu’aquel messatge manca a las nòrmas d’usatge sus l’enaurament de la violéncia. “Aqueles sacamands desondran la memòria de George Floyd, e o permetrai pas. Veni de parlar amb lo governador Tim Walz e li ai dich que los militars son amb el entrò la fin. Se i a quina dificultat que siá assumirem lo contraròtle, mas quand comença lo sacatge, que comence la fusilhada. Mercés!”.




La CNN enregistrèt en dirècte com la polícia de Minneapòlis aviá arrestat la còla de raportaires de la cadena que raportavan los eveniments.
 

 


abonar los amics de Jornalet

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Franc Bardòu
2.

#1 Demembrem pas que polícia e justícia dels Estats-Units son elegidas de per la populacion ? E ben çò segur, es que la guardia civil qu'a tutat sul cap dels votants catalans lo 1er d'octòbre de 2017, non èra pas estada, ges ni mica, elegida pel pòble catalan, nimai la justícia qu'a embarrat preisonièrs politics per aver consultada electoralament sa populacion !

Trump a publicat un messatge sus Twitter ont menaça de fusilhar los manifestants. Al mens, aquí vesèm clarament a quina politica s'opausan aqueles manifestants. La democracia non s'obten pas per l'operacion del sant esperit. Se ganha en l'agantant, sense escotar la sufisença de los que condescendon o non a nos ausir cridar…

  • 9
  • 0
Mèfi! 31
1.

Desmembrem pas que polícia e justícia dels Estats-Units son elegits de per la poblacion, e que son per ansí le reflècte de l'opinion dominanta. Çò que n'ditz long...
"Minneapòlis": la marca grafica de l'accent tonic non correspond pas al biais de díser american, que "polis" (villa) i es un mot restacat al precedent (enclitic) e que le quich i pòrta sulla "A" , sia Minneà-polis.
L'Occitan natural pòt perfèctament ou díser, tot coma baila-mela..., Per quant al timbre "Ò", es secondaire sonque etimologicament confòrma.
De véser Antípolis (Antíbol), Neàpolis (Nàpoli)...

  • 3
  • 3

Escriu un comentari sus aqueste article