NRL: los Polets sortisson de l’uòu
 
De segur, los estadis son voides; s’i pòt plan metre de falses espectators de carton e passar de bruch de fola; las partidas se debanan sus solament sièis pelenas... Empacha pas que l’espectacle e l’engatjament son al rendètz-vos. La novèla règla dels 6 de mai (6 tenguts de mai per una fauta al tengut) accelèra lo jòc; se doblida lèu que l’arbitre de camp se torna trapar solet; quand se marca un ensag, òm se tusta sus las espatlas, òm se congratula normalament, plan luènh de las danças bufècas impausadas als fotbolaires alemands… Òc, lo XIII pren encara mai d’ample!
 
Per aquesta represa, dijòus, las Anguialas de Parramatta assuquèron a Brisbane los Bròncos: 34-6. Divendres, vegèt una larga victòria dels Vaquièrs contra los paures Titans 36-6 qu’encadenan una quatorzena desfaita dempuèi una magrinèla victòria 9-6 fàcia a Brisbane fa un an (lo 9 de junh de 2019)!
 
Dins lo dèrbi de Sydney, los Polets ne profeitèron per ganhar lor primièra partida de la sason fàcia als Lapinons 28-12.
 
Dissabte vegèt los neozelandeses dominar un Sant Jòrdi mut: 18-0; los Tigres s’impausavan fàcia las Làmias: 28-16. A Melbourne, Canberra, mai en ritme, s’investiguèt dins son ròtle de bèstia negra de la Tempèsta: 22-6.
 
La 3a jornada de la sason se clavèt aqueste dimenge amb una victòria confortabla de Manly suls Dògols (32-6). Penrith dominèt lo primièr temps, marquèt un ensag a 8 punts (ensag + transformacion + penalitat en rason d’una brutalitat sul marcaire) mas dins lo segond temps Newcastle tornèt a nautor (14-14). Lo dobertura de Penrith manquèt cinc tombats entre las darrièras minutas e la prolongacion s’acabèt sens venceire.
 
Parramatta e Canberra son los sols a aver ganhadas las tres partidas jogadas, alara que 4 formacions an encaissat 3 desfaitas:las Làmias, los Dògols, Sant Jòrdi e los Titans.
 
En cap d’aficha aquesta setmana: Brisbane-Polets, dijòus; Melbourne-Lapinons, divendres; Parramatta-Manly, dissabte.
 
 
Res de nòu…
 
Per Tolosa en Championship e los Dragons en Superliga, la setmana portèt pas cap d’informacions novèlas sus la represa de la sason.
 
 
Espandiment del XIII dins lo Pacific
 
Se met en plaça un projècte Pacific 13 qu’auriá per basa Nouméa e interessariá los territòris “franceses” de Canaquia, Polinesia, Wallis e Futuna e, tanben, las illas Vanuatu e Salamon. La tòca es l’inscripcion de la formacion novèla en Copa de Queensland per 2023 (lo nivèl en dejós de l’NRL) e, darrièr lo cap, l’idèa de trapar de jogaires novèls pel XIII de França. La primièra sesilha de recrutament recampèt un vintenat d’esportius aqueste dissabte 30 de mai a Nouméa. La formacion a ja una mairina: l’audenca Laureana Biville, jogaira professionala a Auckland.
 
 
Los copiaires
 
Los responsables del XV vòlon metre en plaça de règlas novèlas aprèp la pandemia per evitar los contactes (?) entre jogaires e a l’encòp rendre lo jòc mai atentiu. An pas agut tròp a se triturar las mesolhas per trapar de solucions inspiradas del…XIII: pas de mesclanha de tornar faire, un pè avançat pel talonaire, remandadís de jos las barras s’un atacant es blocat dins l’en-but, presa en compte del tengut-dreit, una sola butada per maul… Los puristas romegaràn e los tretzistas soriràn!
 
 
 
Alan Roch