Tres dels scientifics que signavan lo polemic article publicat dins la revista The Lancet contra l’usatge de l’idroxicloroquina per tractar de malauts de la covid-19 se son retractats del tèxt après que dimècres passat The Guardian revelèt que la basa de donadas qu’empleguèron a una origina plan dobtosa. A partir d’aquel article, l’Organizacion Mondiala de la Santat (OMS) e divèrses govèrns decidiguèron d’arrestar totes los estudis clinics sus l’idroxicloroquina. Lo jornal britanic publiquèt ièr dijòus la retractacion dels autors.
 
De fach, The Lancet a retirat l’article a la demanda del professor Mandeep Mehra, de l’espital Brigham and Women de Boston, l’autor principal del tèxt, per la manca d’exactitud de las donadas que las faguèron servir per l’escriure. De son latz, l’editor de The Lancet, Richard Horton, a plangut la marrida praxis dels autors de l’article.
 
Los autors asseguran que la societat estatsunidenca Surgisphere lor autregèt pas totas las donadas per far una revision independenta posteriora e remeton en causa ara la veracitat d'aquelas donadas. L’OMS a  doncas represes los ensages clinics amb l’idroxicloroquina aquesta setmana.


 

A @Guardian investigation revealed errors in the data that was provided for the #hydroxychloroquine research by US company Surgisphere.
The Lancet has now retracted the #coronavirus drug paper. https://t.co/6wYc7J5etJ#Science

— Open Art Data (@OpenLinkArtData) June 4, 2020