Pels Dragons Catalans e per la Superliga, la tendéncia es mai que mai, per ara, a una represa del campionat en agost, mas caldriá esperar la fin d’aquel mes o setembre per veire los Sang e Aur sus la pelena de Brutus.

Aprèp lo “twist again”, vaquí lo temps del “six again”
 
Las doas jornadas de represa del campionat NRL se caracterizan per una acceleracion novèla del jòc, en particular amb la règla novèla de represa dels tenguts a zèro: six again-sièis tornarmai (en plaça d’una penalitat) per una fauta dels defensors d’alentiment dels tenguts.
 
Los Polets anèron balhar la leiçon als Bròncos a Brisbane: 59-0. Melbourne domina los Lapinons: 22-8. Amb Ponga a la manòbra, Newcastle distància Canberra 34-6. Los Titans n’acaban amb lor cordelada de desfaita amb un ensag a la darrièra minuta contra los Tigres: 28-23.
 
Lo rescontre lo mai disputat vei Parramatta batre 19-16 las Aglas de Manly per demorar la sola formacion amb 4 victòrias per 4 partidas jogadas.
 
Divendres, las Anguialas jogaràn contra las Pantèras, per la partida bèla de la cinquena jornada.
 
 
Lo public de retorn
 
Aquelas doas jornadas de represa se debanèron a pòrtas barradas. Per aver una “preséncia” suls sètis dels estadis, los afogats podián per 22 dollars australians (un quatorzenat d’euròs) se trapar jos forma d’efígia en carton.
 
Lo primièr còp, de trufets botèron la fotografia d’un criminal o la del conselhièr politic autodesconfinhat de Johnson, lo primièr ministre anglés. Per la segonda dimenjada, se vegèt aparéisser de fotografias de gos o de papagai!
 
Mas aquò serà ja del passat aquesta setmana, vist que lo govèrn de Nòva Galas del Sud autoriza lo retorn dels espectators dins los estadis: per l’ora, en nombre limitat e amb totas las mesuras sanitàrias qu’impausa la situacion.
 
 
Lo jòc que s’arrèsta pas jamai
 
Dins son emission de ràdio Super-Moscato-Show sus RMC-Sports, Vincenç Moscato, lo talonaire internacional del XV vengut animator e umorista, diguèt a prepaus de la represa de la competicion australiana que los tretzistas èran los atlètas los mai fòrts de totes los espòrts; Danís Charvet (que foguèt un grand tres-quarts de l’Estadi Tolosan) parlèt del XIII, aquel espòrt ont l’accion s’arrèsta pas jamai e l’ancian fotbolaire de l’OM Eric di Meco, en sovenir de son professor de matematicas tretzista dins un collègi de Vauclusa, afortiguèt: “Lo XIII es lo rugbí vertadièr!” Tres de mai que ne son segurs: “Lo XIII, aquò òc!”
 
 
 
 
Alan Roch