Las nombrosas protèstas contra la mòrt de George Floyd començan d’aver d’efièches politics. En mai de la reforma radicala de la polícia que la fa la ciutat de Minneapòlis e qu’anonciàvem dimars passat, de congressistas, de conselhs municipals e quitament de govèrn dels estats començan de trabalhar per far venir realitat las revendicacions dels manifestants.
 
Lo cònsol màger de Nòva York, al començament, aviá enebit a la polícia l’opression sul còl coma tecnica d’immobilizacion. Mas ara, a mesura que las protèstas se son intensificadas, es anat mai luènh e a anonciat que reduiriá lo budget de la polícia d’aquela ciutat. La comuna de Los Angeles a anonciat de mesuras similaras.
 
Per totes los Estats Units, los legislators an capitat a aprovar una tièra de mesuras gaireben sens precedents, que comprenon l’anullacion de la règla d’amagar al public los antecedents dels agents.
 
De lor costat, los democratas an tanplan reagit a la Cambra dels Representants, la sola del Congrès ont ajan la majoritat, en tot entamenar de mesuras istoricas. Après uèch minutas de silènci amb un genolh mes al sòl, anoncièron que los excèsses policièrs serián desenant considerats coma de delictes d’òdi, que se proïbiriá als policièrs la tecnica d’opression sul còl e que rendrián obligatòri l’emplec de camèras per enregistrar las accions de cada policièr. En mai d’aquò, an anonciada la creacion d’un registre federal de donadas suls antecedents dels agents.
 
Mentretant, la majoritat republicana al Senat sembla  de voler pas aviar cap de cambiament, e declara que crenh que las mesuras impulsadas pels democratas empediscan la polícia de far sa tasca per luchar contra lo crime.
 
Per carrièras, las revendicacions contunhan.