La cadena de television de Qatar, Al Jazira (transcrivon Al Jazeera) a anonciat qu’intra dins lo mercat comunicatiu estatsunidenc en tot crompar lo canal per cable Current TV, fondat per l’èx-vicepresident Al Gore, per fin d’emetre de nòvas per l’audiéncia dels Estats Units. “I aurà un periòde de transicion de la programacion actuala fins que lo nòu canal d’Al Jazira comence d’emetre”, çò an comunicat los responsables de la television aràbia.

Dins lo sieu plan d’implantacion, Al Jazira a l’intencion d’agrandir los sits actuals dins lo país (Washington, Los Angeles, Miami e Chicago) e tanben lo personal fins a superar los tres cents salariats.
 
Lo director general d’Al Jazira, Ahmad Bin Jasim Al Thani, a explicat que la creacion del nòu canal e l’aqueriment de Current TV son un fach istoric per l’emissora. “La decision de crear un canal als Estats Units se basa sul fach que los espectators an ja una granda demanda per Al Jazira. 40% dels usatgièrs del sit web en anglés del mèdia son estatsunidencs”, çò a apondut.
 
Al Jazira foguèt fondada per l’emir Hamad Bin Jalifa Al Thani, que contunha d’èsser al poder, e comencèt emetre en l’an1996. Èra d’en primièr una cadena gratuita e pagada per la familha reiala de Qatar, mas pauc a cha pauc comencèt d’èsser pagada pels servicis e venguèt financièrament independenta. Malgrat tot, la familha Al Thani a encara lo contraròtle del mèdia, qu’aperten a la Corporacion dels Mèdias de Qatar, un organ governamental.