capçalera campanha

Actualitats

PoliticaSocietat

De manifestacions pertot contra lo racisme e las violéncias policièras

L’afar de Floyd als Estats Units, o los murtres d’Adama e recentament de Gabsi, mòrt après son arrestacion a Besièrs, an mobilizat lo país, e l’estat, contra las violéncias policièras

| @324cat
Contunhan en Occitània, e per tot l’estat francés, las protèstas contra lo racisme e las violéncias policièras. Las protèstas mondialas, descadenadas pel murtre de George Floyd tuat per un policièr als Estats Units, an recobrat lo remembre de l’afar d’Adama Traoré, un jove de 24 ans defuntat lo 19 de julhet de 2016 dins la gendarmariá de Persan, al nòrd de París, après èsser detengut per la polícia francesa, e de plan d’autras mòrts causadas per las fòrças de l’òrdre.
 
A Montpelhièr, almens un milièr de personas, segon Midi Libre, manifestèron dissabte dins la calma en memòria de totas las victimas de las fòrças e l’òrdre. D’efièch, legiguèron una lista de totas las personas mòrtas dempuèi lo començament de l’annada entre las mans de la polícia, dont Mohamed Gabsi, un òme de 33 ans e paire de 3 enfants, que moriguèt après que la polícia l’aguèt arrestat l’8 d’abril passat a Besièrs per aver pas respectat lo confinament. En aquela vila faràn lo 20 de junh venent una marcha blanca a sa memòria.
 
 
 
 
Mentretant, a Pau qualques centenats de personas, segon Sud Ouest, jonhián la crida de Libertat per manifestar contra lo “racisme d’estat”. La marcha seguissiá l’indignacion provocada per la degradacion de l’estatua de l’abolicion de l’esclavatge; una degradacion revendicada per un grop neonazi.
 
 
 
Marselha
 
 
 
A París, la polícia e los indentitaris atacan los manifestants
 
A París, la manifestacion foguèt la mai multitudinària de l’estat. Environ 20 000 personas deguèron afrontar doas menas d’agressions; d’un caire, la de la polícia que los ataquèt amb de gases lacrimogèns, e de l’autre, d’un grop ultradrechista conegut coma los identitaris que tanben ataquèron qualques manifestant e quitament despleguèron una enòrma bandeiròla que cercava de denonciar lo «racisme antiblanc». Totun, non solament los identitaris obtenguèron los crits de refús dels manifestants mas quitament los abitants de l’immòble ont s’èra desplegada la bandeiròla i reagiguèron amb indignacion.
 
 
 
Amnestia internacionala demanda de reformar la polícia
 
Amnistia Internacionala França demandèt dissabte passat a las autoritats francesas que se combatèsse la discriminacion e l’impunitat de l’usatge illegal de las fòrça de polícia. L’organizacion umanitària demanda la suspension de la tecnica dicha del placatge ventral e l’abolicion d’armas coma lo lançador de balas de defensa (LBD-40), qu’an provocat de nafraduras grèvas e irreversiblas e mai la mòrt. Tanben exigisson que las granadas de desencerclament sián enebidas car constituisson “una responsa desproporcionada”.
 
 
 
 
abonar los amics de Jornalet
 
 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Peta si Quò
2.

Cada jorn vene legir los articles de Jornalet per ma seança de racatge quotidiana

  • 0
  • 0
Pierre LACHAUD
1.

Fau problem, faussas revendicacions.
L'om creu se battre per la patria, l'òm se bat per daus merchands de canons.
l'òm creu se battre contre lo racisme e las violenças policieras, l'òm se bat per los qu'orgnaisan lo racisme e las violenças policieras.
Tot aquò perque tots los medias son paiats et tenguts per los millardaires.
Tot aquò perque la propaganda de l'esquerra es tenguda per los mesmes milliardaires.
Tot aquò perque l'òm assimila a tort lo problem frances au problem d l'america.
I a pas pire ipocrisia que de s'agenolhar.
L'om a pas vist los occitans s'agenolhar per damandar perdon aus catars, perque los catars fan pas partida de la propaganda daus millardaires.

  • 7
  • 7

Escriu un comentari sus aqueste article