L’Ofici Public de la Lenga Occitana presentèt diluns passat un avançament de l’enquista sociolingüistica de l’occitan que l’a menada aquel organisme dins los territòris occitanofòns de las regions nomenadas Nòva Aquitània e Occitània e tanben en Aran. Delà las competéncias lingüisticas, lo sondatge incorporava de questions sus l’avaloracion sociala de la lenga que sos resultats son fòrça optimistas: mai d’un 90% son favorables a de politicas lingüisticas per sosténer e far créisser la lenga (un 99% en Aran). Quant al nom de la lenga, tanben l’immensa majoritat preferisson la denominacion “occitan”: un 82% en Nòva Aquitània, un 92% dins la region qu’a pres lo nom d’Occitània e un 73% en Aran.
 
Lo sondatge, realizat per telefòn sus mai de 8000 personas, soslinha lo melhor estat de l’occitan en Aran, ont lo 61% dels enquistats parla la lenga del temps que solament l’1% la parla dins la rèsta dels territòris. Dins aquel sens, durant la presentacion se reconeguèt l’importància de las politicas lingüisticas aplicadas en Aran ont es lenga veïculara dins l’educacion e lenga d’usatge preferencial de l’administracion publica.
 
Las donadas definitivas del sondatge se publicaràn a la rintrada.
 

	Nòva Aquitània	Region Occitània	Val d’Aran
Compren	28%	40%	86%
Parla	6%	6%	61%
Legís	8%	8%	63%
Escriu	1%	1%	39%

 
Los escambis telefonics s’entamenèron en francés o en espanhòl, puèi se perseguiguèron en occitan, pel mond qu’avián declarat mestrejar la lenga per fin de testimoniar de lor occitanofonia.

 
D’analisis qualitativas complementàrias

Dins un segond temps, l’ÒPLO a anonciat que metriá en perspectiva las donadas del sondatge sus de draias d’analisis qualitativas complementàrias. A mai, dos cercaires quebequeses especializats en sociolingüistica rescontraràn un panèl de seissanta personas sortidas de las convèrsas telefonicas per abordar mai en detalh la relacion que ligan los occitanofòns a la lenga, lor nivèl d’estacament afectiu, la question de la transmission de la lenga, mas tanben per fin de comprene los empediments rescontrats pels non-occitanofòns.
 
Amb aquela òbra, l’ÒPLO espèra d’aver una melhora coneissença dels blocatges e de poder aital favorizar, per una transmission e un usatge pus grand de l’occitan, l’aument del nombre de locutors. Tanben se vòl trobar quinas son las representacions associadas a l’ensenhament de l’occitan, perqué los parents causisson d’escolarizar lor enfant en cursus bilingüe (immersiu o non), perqué aqueles percorses se perseguisson fins al licèu o perqué de còps s’estancan.
 
Escotatz l’enregistrament sonòr de la presentacion.