Actualitats
Eleccions municipalas: quinas son las listas labelizadas Occitània-País Nòstre?
Lo movement se regaudís de l’eleccion en seguida del primièr torn d’11 cònsols màgers del temps que, per lo segond torn, apèla a votar per un vintenat de listas
Après un primièr torn marcat per l’abstencion e per lo començament de la crisi sanitària de la covid-19, se tendrà dimenge lo segond torn de las eleccions municipalas dins l’estat francés, çò que pertòca la màger part d’Occitània e supausa totjorn una escasença per l’occitanisme.
De fach, l’occitanisme sembla de s’èsser reviscolat un pauc en aquestas eleccions, saique a causa de la situacion d’urgéncia nacionala que la patís la lenga nòstra dins los domenis cultural, educatiu, lingüistic, economic, social e environamental. Es encoratjant que las quatre candidaturas principalas que se son presentadas a Tolosa prepausen dins son programa de politicas per la lenga occitana del temps qu’a Niça s’es tanben presentada una candidatura nomenada Viva Niça 2020 amb de claras politicas lingüisticas per l’occitan. A mai, lo movement politic occitanista amassat a l’entorn de Bastir, labelizat aqueste còp coma Occitània-País Nòstre es totjorn un fenomèn interessant e encoratjant. Aquel movement se regaudís de l’eleccion en seguida del primièr torn d’11 cònsols màgers del temps que, per lo segond torn, apèla a votar per aqueste vintenat de listas:
Agenés
— Marmanda (Marmandés): lista “100% Marmande”, conducha per Daniel Benquet
Albigés
— Albi (País d’Albi): lista “Collectif Vert Albi”, conducha per Nathalie Ferrand-Lefranc
— Rabastens (Galhaqués) “Couleurs rabastinoises”, conducha per Sandrine Madesclair
Auvèrnhe
— Clarmont-Ferrand (Limanha): lista “Naturellement Clermont”, conducha per Olivier Bianchi
Carcin
— Grisòlas (Bas Carcin): lista “Réinventons Grisolles”, conducha per Geoffrey Sapin
— Montalban (Bas Carcin): lista “L’alternative pour Montauban”, conducha per Arnaud Hilion
Comenge
— L’Isla de Haut (Baish Comenge): lista “Générations L’Isle-en-Dodon”, conducha per Lionel Welter
— Montmaurin (Nebosan): candidatura de Charles Dugros
— Sent Gironç (Coserans): lista “Une volonté citoyenne pour Saint-Girons”, conducha per Dominique Antras
Lemosin
— Lemòtges (País de Vinhana): lista “Gauche citoyenne sociale et écologiste”, conducha per Thierry Miguel
Bas Lengadòc
— Carcassona (Carcassés): lista “Énergie citoyenne”, conducha per Tamara Rivel
— Fluris (Narbonés): lista “Ensemble pour l’avenir”, conducha per Martine Cadena
— Limós (Rasés): lista “Agir ensemble”, conducha per Pierre Durand
— Montpelhièr: “Montpellier Uni”, conducha per Michaël Delafosse
— Narbona (Narbonés): lista “Nouveau Narbonne” conducha per Didier Mouly
Naut Lengadòc e Gasconha Tolosana
— Colomièrs (Tolosan): lista “Mieux vivre ensemble à Colomiers”, conducha per Patrick Jiména
— La Barta de Lesa (Lauragués): lista “Unis pour Labarthe” conducha per Christine Roussel
— Sent Lis (Tolosan): lista “Imagine Saint-Lys”, conducha per Nicolau Rei-Bèthvéder
— Tolosa (Tolosan): lista “Archipel citoyen”, conducha per Antoine Maurice
Peiregòrd
— Brageirac (Brageiragués): lista “Bergerac en commun”, conducha per Julie Téjérizo
Roergue
— Rodés (Leveson-Rodanés): lista “Notre parti, c’est Rodez”, conducha per Christian Teyssèdre
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Non sabi s'es l'efècte d'enumeracion, mas de legir lo nom de totas aquelas formacions electoralas de seguida me fa venir una irresistibla enveja de rire… E non me fa rire aquestas tièras especificament. Pensi que tota autra seguida de tièras electoralas me plegariá de rire tot parièr. Cresi que tot se jòga (al plan umoristic), dins çò tacit contengut dins cada nom de tièra. D'exemples ?
"Brajeirac en comun" : imaginam la tièra advèrsa que se diriá "Brajeirac, cadun solet dins son canton", jos los auspici de l'extension neoliberala del domani de la luta, coma o diriá Houellebecq (abans d'inventar son personatge mediatic actual).
"Ua volontat ciutadana ende Sent Guironç" : imaginam aisidament l'oposicion, dita "una inchalença aristocratica contra Sent Guironç"…
"Mièlhs viure amassa a Colomièrs" : comprenèm tacitament que per la concuréncia, s'agís donc mailèu de "Subreviure penosament dins la solitud a Colomièrs", çò que remanda egalament a Houellebcq, un còp de mai.
Mas lo que mai m'agrada es encara "Colors rabastinesas". Quina oposicion ? "Negre e blanc rabastinat" (pels tons sepia…) ?
Un pauc mai seriosament, perqué totas aquelas tièras non prenon pas tot simplament un nom politic ? Socialistas de tal canton ? Union d'esquèrra de tal autre canton ? Neoliberals de tala vila ? Fascistas e racistas de tal vilatge… Perqué non dison çò que son, a de bon ?
1) Socialistas de dreita que nos trufam plan de vosautres…
2) Ecologistas que sostenèm la creissença (en la pretendre vèrda) e que donc nos trufam plan de vosautres, benlèu mai encara que los socialistas…
3) Comunistas autoritaristas e imperialistas franceses…
4) Neoliberals per qui non trabalham pro e sèm plan tròp pagats…
5) "La repression en marcha" (LAREM) qu'impausam a partir d'un detzen del còs electoral sonque d'impausar una majoritat ni d'esquèrra ni d'esquèrra, mas plan de dreita autoritarista e de mai en mai violenta…
6) Partit petainista, racista e iperautoritatrista…
7) Partit reialista francés que mespresam (el, obèrtament, al mens) lo pòble, ja que ne nos consideram luènh en subre…
Vertat es que los noms que se tròban semblan plan mai de noms de lessivas o de clubs esportius, non ?
Aquela manca de lisibilitat ideologica participa de far venir de mai en mai bufèca tota consultacion electorala. De la politica que volèm a de bon, aqueles arlangdièrs, gaireben totes, un còp als afars, se'n chautan ben pro…
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari