Lo movement Idle No More a anonciat una campanha per blocar de camins de fèrre e de frontièras. Los activistas indigènas protèstan contra una lei que la considèran malfasenta envèrs los lors dreches, que Canadà a reconeguts. Una de las caps dels pòbles autoctòns a exigit de se reünir amb Harper per debatre la lei nòva.

Dels pòbles indigènas canadians, es sorgit lo movement de protèsta Idle No More (que se poiriá revirar aperaquí per “pro d’inactivitat” o “pas mai de passivitat”): es a prene de vam progressivament e visa dirèctament lo primièr ministre del país, Stephen Harper. Los activistas se prepausan de blocar de camins de fèrre e de frontièras dins los jorns venents (o an ja fach dins qualques endreches de Quebèc e d’Ontàrio): o a anonciat una pòrtavotz del movement, Theresa Spence, qu’es cap de la nacion attawapiskat.
 
Las protèstas, que comencèron en novembre passat, son la reaccion de qualques sectors indigènas a la lei C-45. Los activistas d’Idle No More comprenon que la lei levarà la proteccion a fòrça flumes navigables de Canadà se trobant dins de territòris indigènas, e aquò, çò dison, viòla los tractats que lo país a signat amb los pòbles autoctòns. Lo govèrn d’Harper se defend, e ditz que la lei C-45 cèrca solament de protegir lo desvolopament economic del país.
 
Lo movement a ganhat fòrça visibilitat dempuèi que, l’11 de decembre passat, Theresa Spence comencèt una cauma de la fam e, çò assegura, quitarà pas fins qu’Harper accèpte de se reünir amb ela per parlar de la lei nòva. Harper, a l’ora d’ara, a pas volgut rescontrar Spence, e li a prepausat una reünion amb lo ministre dels Afars Aborigèns. La cap de la nacion attawapiskat o accèpta pas.
 
Divèrses dobtes son ara sus la scèna politica canadiana. D’un costat, i a la question de fins a qual ponch los pòbles indigènas poiràn articular una protèsta continua e coesionada. De l’autre costat, òm se demanda fins a quora e dins quina mesura contunharàn de recebre lo sosten dels canadians non autoctòns que son favorables a las lors revendicacions (coma, per exemple, los grops ecologistas). E, fin finala, cal veire s’aquò vendrà una batalha partisana, ont las fòrças dels opausants a Harper assumiscan las demandas del movement Idle No More per metre en embarràs lo primièr ministre canadian.
 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.