La nòva escòla Calandreta que va dobrir lo 1r de setembre que ven a Vauriàs (Enclava dei Papas) cèrca de sostens. An agut l’astre de recuperar de mòbles de particulars e d’associacions mas ara vòlon poder pagar los salaris de l’ensenhaira e de l’assistenta mairala. En mai d’aquò, an de realizar de trabalhs de plombariá, d’electricitat e de revestiments per environ 6000 èuros. Per tot aquò demandan d’ajudas, pontualas o regularas.
 
Se pòt mandar de chècs a: Calandreta de Vauriàs, en çò de G. Vaton, 2 Route de la Cave - 26110 Vinsòbres, o se pòt realizar un transferiment bancari sul compte que veiretz sus l’imatge en clicant aicí.
 
Aquela nòva calandreta va dobrir dins la rintrada que ven e serà la 65a escòla associativa immersiva en occitan e la tresena de Provença. La còla pedagogica e associativa es compausada de Mireille Roubé (directritz), Élodie Coudert e Erika Perdriol, e s’i aculhirà d’enfants de 2 a 4 ans, per un ensenhament mairal.
 
Ara per ara, los parents inscriches son a preparar lo local mes a disposicion per la comuna, en fàcia de l’Ostal de l’Enfança. L’escòla ten mai de 100m² per una sala de classa, un espaci de dormida e una cosina.
 
Las calandretas son d’escòlas laïcas e associativas qu’an un contracte amb l’estat francés, qu’emplegan la lenga occitana coma lenga veïculara sul programa educatiu fixat pel Ministèri de l’Educacion de França. La relacion entre los professors e las familhas es fòrça estrecha e los parents se pòdon engatjar dins lo projècte fins ont voldràn. En mai d’aquò, cada calandreta a una relacion de proximitat amb son entorn immediat, e aital la coneissença de la realitat pròcha e l’engatjament dels escolans amb l’entorn son plan nauts. La primièra calandreta se fondèt a Pau en 1979.