Enfin, l’asuèlh s’esclairís e se comença de veire tornar las linhas de tòca, la linha d’ensages, los pals e d’òmes bariolats que corrisson en se passant una palma ovala amb un autre qu’arrèsta pas de fiular! Serà doncas lo dimenge 2 d’agost que la Superliga tornarà prene son cors.

Represa fàcia a St Helens pels Dragons Catalans
 
Los catalans faràn part d’aquela jornada de represa que se tendrà sus un sol estadi, a pòrtas barradas, amb tres partidas al programa: Hull KR-Toronto, St Helens-Dragons e Huddersfield-Rhinos.
 
La setmana seguenta, se debanarà una jornada completa amb doncas sièis partidas. Atal, quinze jornadas menaràn a la finala a la fin de novembre. quatre formacions se qualificaràn per las mièjas finalas.
 
Los responsables van seguir l’evolucion de las mesuras sanitàrias per considerar lo retorn del public en tribunas. La cadena de television Sky-Sports s’assòcia a la represa e a la seguida de la competicion amb la difusion del mai grand nombre possible de rescontres.
 
De son costat, Tolosa deurà esperar lo 6 de julh per saber la decision a respècte de la seguida o de l’arrèst de la sason en Championship.
 
 
NRL: un punt en aur per las Anguialas
 
Las Anguialas de Parramatt sèrvan lor primièra plaça al classament del campionat NRL. Menavan 24-12 a un quart d’ora de la fin, mas Canberra marcava dos ensages per tornar a 24-24; calguèt esperar la 7a minuta de las prolongacions per que l’arrièr de Parramatta passèsse lo tombat de la victòria (25-24).
 
Los neozelandeses an pas existit fàcia a Melbourne: 50-6. A la fin de la partida, los jogaires de la Tempèsta anèron dins lo vestiari de lors adversaris per remontar lo moral a una formacion que pòt pas tornar en cò sieu en rason de las règlas sanitàrias.
 
Novèla desfaita de Brisbane, despassat pels Titans: 30-12. Las Pantèras mantenon lor ritme en dominant los Lapinons: 20-12.
 
 
Sul mercat de Lesinhan
 
L’FC Lesinhan anóncia las signaturas del capitani de St Estève-XIII Catalan: Joan Guasch (filh del president dels Dragons) e del tres-quarts australian Jacob Gagan qu’a jogat un desenat de partidas en NRL.
 
Lo mesclanha de Tolosa Olimpic Stan Robin torna dins son club formator: Vilanòva d’Òlt.
 
Carcassona fa la causida de faire tornar lo maxim de jogaires formats al pè de Ciutat, mas cèrca tanben qualques estrangièrs e de renfòrces pel paquet de davants.
 
 
 
 
Alan Roch